पोखरा– पोखराको पृथ्वीनारायण (पृना) क्याम्पसमा अनेरास्ववियूले आफ्नो ऐतिहासिक विरासत कायम राख्दै सम्पूर्ण प्यानलसहित विजय हासिल गरेको छ ।

यस निर्वाचनमा कांग्रेस निकट नेपाल विद्यार्थी संघ, समाजवादी मोर्चा, तथा स्वतन्त्र उम्मेदवारहरूले अनेरास्ववियूको प्रभाव भत्काउने प्रयास गरेका थिए । तर, ती सबै चुनौतीहरू पार गर्दै विष्णु पोखरेल नेतृत्वको अनेरास्ववियू प्यानलले विजय हासिल गरेको हो ।

अध्यक्ष पदमा विष्णु पोखरेलले १,१०५ मत प्राप्त गरी दोब्बरभन्दा बढी मतान्तरसहित जित हासिल गरेका छन् । उनका प्रतिद्वन्द्वी नेपाल विद्यार्थी संघका सुशील न्यौपानेले ५०३ मत प्राप्त गरे । स्वतन्त्र उम्मेदवार विप्लवी न्यौपानेले ४६९ मत ल्याइन् भने माओवादी निकट अनेरास्ववियू क्रान्तिकारीका नवीन अधिकारीले २२३ मत पाए । समाजवादी मोर्चाका सन्तोष पौडेलले १९६ मत ल्याए ।

सचिव पदमा विराज दुवाडीले १,४१३ मत ल्याई लोकप्रिय मतसहित विजयी भए । उनका प्रतिस्पर्धी नेविसंघका विवेक भट्टराईले ६२८ मत प्राप्त गरे । कोषाध्यक्षमा अनेरास्ववियूकी सन्दिका गुरुङ १,३०४ मतसहित विजयी भइन् ।

९ हजारभन्दा बढी विद्यार्थी अध्ययनरत रहेको भनिएको पीएन क्याम्पसमा ७,४०० विद्यार्थीले परिचय पत्र लगेका थिए, तर कुल २,८९७ मत मात्र खसेको थियो । कुल मतदातामध्ये ३९.१२ प्रतिशत मात्र मतदानमा सहभागी भएका थिए, जुन क्याम्पसको इतिहासमै सबैभन्दा कम मत प्रतिशत हो ।

पृथ्वीनारायण क्याम्पसलाई विद्यार्थी नेताहरू उत्पादन गर्ने संस्थाका रूपमा लिइन्छ । यहाँका पूर्वस्ववियु सभापतिहरू विभिन्न उच्च पदहरूमा पुगिसकेका छन् । पूर्वप्रदेश प्रमुख सोमनाथ प्यासी, पूर्वमुख्यमन्त्री खगराज अधिकारी, स्वर्गीय पूर्वमन्त्री रवीन्द्र अधिकारी, पोखराका मेयर धनराज आचार्य, राजनीतिक विश्लेषक झलक सुवेदी, पूर्व मन्त्री पदम गिरी लगायतले यही क्याम्पसबाट नेतृत्व गरेका थिए ।

स्ववियु सभापति बनेका विष्णु पोखरेल यसअघि पनि उम्मेदवार रहेका थिए, तर विवादका कारण निर्वाचन हुन सकेको थिएन । उनले आफ्नो विजयलाई विद्यार्थीहरूका लागि समर्पित गर्दै, स्ववियुलाई सबै विद्यार्थीहरूको साझा संस्था बनाउने प्रतिबद्धता जनाएका छन् ।

१६ वर्षअघि भएको चुनावमा अनेरास्ववियूकै रश्मि आचार्य सभापतिमा निर्वाचित भएका थिए ।