काठमाडौं – इण्डियन प्रिमियर लिग (आइपीएल) अन्तर्गतको आइतबारको दोस्रो खेलमा मुम्बई इण्डियन्सविरुद्ध चेन्नई सुपर किंग्सले चार विकेटको जित निकालेको छ।

टस हारेर सुरुमा ब्याटिङ गरेको मुम्बईले चेन्नाई सुपर किंग्सलाई एक सय ५६ रनको लक्ष्य दिएको थियो। जवाफी ब्याटिङ गरेको चेन्नईले ५ बल बाँकी हुँदा ६ विकेट गुमाएर १५८ रन बनाउँदै लक्ष्य पूरा गरेको हो।

चेन्नईको जितमा ओपनर रचिन रविन्द्र र कप्तान ऋतुराज गायकवाडले अर्धशतक प्रहार गरे। नटआउट ४५ बलको सामना गरेको रविन्द्रले चार छक्का र दुई चौकाको मद्दतमा ६५ रन बनाए भने कप्तान गायकवाडले २६ बलमा ६ चौका र तीन छक्काको मद्दतमा ५३ रन जोड्दै अर्धशतक पूरा गरे। उसका लागि रविन्द्र जडेडाले १७ रन जोडे भने अन्य ब्याट्सम्यानले दोहोरो अंकमा रन जोड्न सकेनन्।

राहुल त्रिपाठी २, शिवमन दुवे ९, दीपक होडा ३, श्याम कुरान ४ रनमा आउट हुँदा महेन्द्रसिंह ध्वनीले नटआउट २ बलको समना गरे ।

मुम्बईका लागि विघ्नेश पुथुरले तीन विकेट हात पार्दा दीपक चाहर र विल ज्याक्सले एकएक विकेट लिए।

चेन्नाईको घरेलु मैदानमा टस हारेर पहिले ब्यटिङ गरेको मुम्बईले निर्धारित २० ओभरमा ९ विकेट गुमाएर एक सय ५५ रन बनाएको थियो।

मुम्बईका लागि तिलक वर्माले सर्वाधिक ३१ रन बनाए। २५ बलको सामना गरेका उनले दुई चौका र दुई छक्का प्रहार गरे। यस्तै कप्तान सूर्यकुमार यादवले २९ बनाउँदा दिपक चहर २८ रनमा आउट भए।

मुम्बईलाई सस्तैमा समेट्न चेन्नाईका लागि नुर अहमदले सर्वाधिक चार विकेट हात पारेका थिए। चार ओभर बलिङ गरेका उनले मात्र १८ रन खर्चिए। उनी खेलको म्यान अफ द म्याच बनेका छन्। उसका लागि अलिल अहमदले तीन विकेट लिए।