पोखरा– चिनियाँ दूतावासका प्रतिनिधि वाङ सिनले पोखरा सभागृह पुनर्निर्माणमा सघाउने प्रतिबद्धता जनाएका छन् । हालै पोखरामा आयोजित सांस्कृतिक कार्यक्रममा उनले उक्त प्रतिवद्धता जनाएका हुन् । चिनिँया सहयोगमा २०४२ सालमा निर्माण भएको पोखरा सभागृह अहिले जीर्ण छ । 

पोखरा महानगरपालिकाले पुनर्निर्माणका लागि डीपीआर तयार पारे पनि बजेटको अभावमा बनाउन सकिरहेको छैन । पोखरा महानगरपालिकाकी उपमेयर मञ्जुदेवी गुरुङले कार्यक्रममा सहभागी चिनियाँ दूतावासका डिसियम वाङ सिनलाई सुनाएकी थिइन् । सिनले पुनर्निर्माणमा सघाउने प्रतिबद्धता जनाएको पोखरा महानगरपालिकाकी उपमेयर गुरुङले बताइन् । 

पोखरेलीको लगानीमा चिनिँया ठेकेदारले पोखरा सभागृह निर्माण गरेको पोखरेली उद्यमी तथा नेपाल उद्योग वाणिज्य महासंघका पूर्वअध्यक्ष आनन्दराज मुल्मीले बताए । चीनको वाटर इन्जिनियरिङ कर्पोरेसनले सभागृह निर्माणको काम पाएको उनले सुनाए । त्यतिबेला पोखरेलीले पैसा जोहो गरेर र सभागृह निर्माणकै लागि छुट्टै करसमेत उठाएर रकम जम्मा गरेको उनले बताए । 

नेपाल–चीन कूटनीतिक सम्बन्ध स्थापना भएको ७० वर्ष पुगेको अवसरमा पोखरामा चिनियाँ सांस्कृतिक कार्यक्रमको आयोजना गरिएको थियो । पोखरा सभागृहमा चिनियाँ कलाकारले आफ्नो मौलिक गीत र नृत्यसहितको प्रस्तुति दिएका छन् । चिनियाँ कलाकारको टोली मंगलबार चीनको छेन्दुबाट सिचुवान एयरलाइन्समा सोझै पोखरा आएका थिए । चिनियाँ सांस्कृतिक कार्यक्रममा चिनियाँ र नेपाली कलाकारले आआफ्नो देशको संस्कृति झल्कने गीत तथा नृत्य प्रस्तुत गरेका थिए । 

सांस्कृतिक कार्यक्रम सुरु हुनुअघि गण्डकी प्रदेश सरकारका उद्योग तथा पर्यटन मन्त्री मित्रलाल बस्यालले पोखरा–छेन्दु सिधा हवाई सेवा सुरु भएकोमा खुसी व्यक्त गर्दै यसबाट गण्डकी प्रदेश र नेपालकै पर्यटन विकासमा महत्वपूर्ण योगदान पुग्ने बताए । 

चीन सरकारले यस वर्ष सन् २०२५ लाई नेपाल भ्रमण वर्षको रूपमा तय गरेकोमा खुसी व्यक्त गर्दै चिनियाँ पर्यटकको आगमन बढ्ने विश्वास गरे । कार्यक्रममा नेपालस्थित चिनियाँ राजदूतावासका डिसियम वाङ सिनले चीन नेपाल ७० वर्ष पुगेको यस अवसरमा नियमित व्यावसायिक चार्टर्ड उडान सुरु भएकोमा खुसी व्यक्त गरे ।