काठमाडौं– ऊर्जा, जलस्रोत तथा सिँचाइ मन्त्री दीपक खड्कालाई पदबाट बर्खास्त गर्न एकजना प्रतिनिधिसभा सदस्यले माग गरेकी छन् । 

आज संसदको शुन्य समयमा बोल्दै सांसद ज्ञानु बस्नेतले ऊर्जामन्त्री खड्काले लोडसेडिङको हल्ला फैलाएर जनतालाई आतंकित बनाएको र नेपाल विद्युत प्राधिकरण ध्वस्त बनाउन लागिपरेको भन्दै बर्खास्त गर्न माग गरेकी हुन् ।

‘ऊर्जामन्त्री दीपक खड्काले हालै नेपालमा पुनः लोडसेडिङ हुने र विगतमा लोडसेडिङ नभएको छिमेकी देशको कारणले हो भन्ने अभिव्यक्ति प्रति खेद व्यक्त गर्दछु, विद्युत प्राधिकरणका कार्यकारी निर्देशक कुलमान घिसिङले लोडसेडिङ छैन र भविष्यमा पनि हुँदैन भनिरहेको स्थितिमा जनतालाई आतंकित पार्ने, दलाल र विचौलिया पोस्ने र विस्तारै नाफामा गइरहेको विद्युत प्राधिकरणलाई ध्वस्त बनाउने षड्यन्त्रमा स्वयम् ऊर्जामन्त्री नै संलग्न देखिएकोले ऊर्जामन्त्रीलाई तुरुन्त बर्खास्त गरियोस भन्ने सभामुख महोदयमार्फत् जोडदार माग गर्दछु’, सांसद बस्नेतले भनिन् ।