काठमाडौं– महानगरीय प्रहरी अपराध महाशाखाको टोलीले काठमाडौंको गोलढुंगामा गोली प्रहार गरी घाइते भएका साजन गुरुङ गुण्डा नाइके समिरमान सिंह बस्न्यातका सहयोगी रहेको खुलेको छ ।

प्रहरीका अनुसार साजनले समिरको समूहमा दोस्रो तहको सदस्यको रुपमा काम गर्ने गरेका थिए । बस्न्यात अहिले केन्द्रीय कारागार सुन्धारामा छन् ।

नेपाल निर्माण व्यवसायी महासंघका अध्यक्ष शरदकुमार गौचनको २३ असोज ०७४ मा बानेश्वरको खरिबोटमा गोली हानी हत्या गरिएको घटनाका समिरमान मुख्य योजनाकार हुन् ।

लामो समयदेखि गुण्डागर्दी गर्दै रकम असुली गर्ने साजन प्रहरीको खोजी सूचीमा रहेका थिए । विशेष सूचनाका आधारमा पक्राउ गर्न गएको टोलीले उनलाई गोली प्रहारी गरी पक्राउ गरेको हो ।

प्रहरीले चलाएको गोली साजनको एउटा खुट्टाको तिघ्रा र अर्को खुट्टाको घुँडामा लागेको जनाइएको छ। धादिङका ३३ वर्षीय साजन कर्तव्य ज्यान मुद्धामा तीन वर्ष जेल बसेर गत वर्षको असारमा छुटेका थिए । पहिले पनि महाशाखाले उनलाई पक्राउ गरेको थियो।