काठमाडौं– उपप्रधान एवम् शहरी विकासमन्त्री प्रकाशमान सिंहले प्राथमिकताका आधारमा योजनाहरूको छनौट गर्नुपर्नेमा जोड दिएका छन् ।

बुधबार सिंहदरबारमा बसेको राष्ट्रियसभा अन्तर्गतको सार्वजनिक नीति तथा प्रत्यायोजित विधायन समिति बैठकमा उनले नेपालको अर्थतन्त्रको अवस्थाको कारण प्राथमिकताका आधारमा योजनाहरूको छनौट गर्नुपर्नेमा जोड दिएका हुन् ।

उनले जुनसुकै योजना भन्दा पनि मुलुकको आवश्यकताका आधारमा योजना छनौट गर्ने र त्यसमा आवश्यक बजेट छुट्टाउन सके समयमा नै काम सम्पन्न हुनसक्ने धारणा राखे । सिंहले बागमती लगायतका उपत्यकाका नदीहरू सफाइका लागि नयाँ रणनीति बनाइरहेको जानकारी दिए ।

उपत्यकाका नदीहरूलाई सुधार्न गर्नुपर्ने धेरै कामहरू रहेको र डिजाइनमा देखिएको समस्याले देखिएका कठिनाइ सुधार गर्ने उनले बताए । 

बैठकमा शहरी विकास मन्त्रालयबाट भइरहेका कामकारबाहीका विषयमा छलफल गरिएको थियो ।