भक्तपुर – चाँगुनारायण नगरपालिकाका प्रमुख जीवन खत्रीले नगरपालिकाभित्र ऊर्जामैत्री भवन निर्माणको व्यवस्था कार्यान्वयनका लागि आग्रह गरेका छन् ।

नगरपालिकाले बिल्डिङ इनर्जी इफिसियन्सी इन नेपाल (बिन)सँगको सहकार्यमा यहाँ आयोजित लघु, साना तथा मध्यम उद्यमीका लागि ऊर्जा प्रभावकारी भवन ‘डिजाइन’ सम्बन्धी तीनदिने तालिमको आज उद्घाटन गर्दै उनले ऊर्जामैत्री भवन निर्माण गर्न नागरिकलाई प्रोत्साहन गर्नुपर्नेमा जोड दिए ।

चाँगुनारायण नगरपालिका ऊर्जा प्रभावकारी भवन निर्माणसम्बन्धी कार्यविधि तयार गरी स्वीकृत गर्ने उपत्यकामा दोस्रो पालिका हो । ऊर्जा बचतको उद्देश्यले नगरपालिकाले आफ्नो पालिका क्षेत्रभित्र व्यापारिक, सामुदायिक तथा आवासीय भवन निर्माण गर्दा ऊर्जामैत्री हुनुपर्ने व्यवस्था लागू गरेको उनले बताए ।

नगरप्रमुख खत्रीले चाँगुनारायण नगरपालिका नयाँ सहरका रूपमा परिणत हुँदै गरेको अवस्थामा सहरलाई बस्न योग्य र ऊर्जामैत्री बनाउने अभियानमा सहयोग गर्न आग्रह गरे । उनले भने,

“नगरपालिकाले ऊर्जामैत्री भवन निर्माणका लागि कार्यविधि पास गरेर कार्यान्वयनको चरणमा छौँ । घर वा भवनको नक्सा बनाउँदा नै प्राविधिकले ऊर्जामैत्री भवन निर्माणले पुर्याउने फाइदाबारे नागरिकलाई परामर्श दिन आवश्यक छ । यसले हाम्रो अभियानमा सहयोग पुग्नेछ ।”

कार्यक्रममा बिनका अध्यक्ष सुदेश प्रजापतिले ऊर्जामैत्री भवन निर्माण ऊर्जा बचतसँगै स्वास्थ्य र वातावरणमैत्री हुने बताए । उनले यस प्रविधिको भवनले कुल ऊर्जा खपतको करिब ६० प्रतिशत वातानुकूलन (ताप वा शीतल) हुने भन्दै नेपालमा यस्ता १० वटा विद्यालय भवन निर्माण भइसकेको र आवासीय भवन निर्माण हुनेक्रममा रहेका बताए ।

चाँगुनारायण नगरपालिकाका बस्ती तथा भवन निर्माण शाखा प्रमुख कृष्णभरोसा बस्नेतले सन् २०४५ सम्म हरितगृह ग्यास उत्सर्जनलाई शून्यमा पु¥याउन सरकारले जनाएको प्रतिबद्धता र सन् २०३० सम्म इँटा तथा सिमेन्ट उद्योगहरूमा कोइलाको खपत र वायु प्रदूषण घटाउनेलगायत अभियानमा नगरको योजनाले सहयोग पुग्ने विश्वास व्यक्त गरे । उनले तालिमले ऊर्जा प्रभावकारी भवन निर्माणमा दक्षता हासिल हुने बताए।

कार्यक्रममा नगरपालिकाका प्रशासन शाखा प्रमुख सुरज पौडेलले नगरपालिका १० हजार स्क्वायर फिटभन्दा माथिको भवन निर्माणमा अनिवार्य ऊर्जामैत्री हुनुपर्ने व्यवस्था भएको जानकारी दिँदै अन्य भवन निर्माण गर्दा पनि नगरपालिकाले ऊर्जामैत्री प्राविधिक र परामर्श सहयोग गर्ने बताए ।