काठमाडौं– नेपालको अर्थतन्त्रमा सबैभन्दा महत्वपूर्ण भूमिका निर्वाह गर्दै आएको रेमिट्यान्समा मध्यपूर्व क्षेत्रमा रोजगारीको लागि गएका श्रमिकको भूमिका सबैभन्दा ठूलो देखिएको छ । मध्यपूर्वी खाडी क्षेत्रमा रोजगारी गर्न गएका नेपालीले सन् २०२३-२४ मा सबैभन्दा धेरै रेमिट्यान्स नेपाल पठाएका छन् ।

नेपाल राष्ट्र बैंकले प्रकाशन गरेको ‘नन–बैंक फाइनान्सियल इन्स्टिच्युसन सुपरभिजन रिपोर्ट २०२३-२४’ अनुसार सन् २०२३-२४ मा नेपालमा १२ खर्ब ९२ अर्ब रेमिट्यान्स भित्रिएको थियो । जुन अघिल्लो वर्ष भित्रिएको रेमिट्यान्स रकमको तुलनामा ६.६८ प्रतिशतले धेरै हो ।

समीक्षा अवधिमा नेपालमा भित्रिएको कुल रेमिट्यान्समध्ये सबैभन्दा धेरै अर्थात् ४१.८८ प्रतिशत मध्यपूर्वमा श्रम गर्न गएका श्रमिकहरूले पठाएका थिए । सोही अवधिमा एशियन क्षेत्रका विभिन्न मुलुकबाट नेपालमा २४.६३ प्रतिशत रेमिट्यान्स भित्रिएको राष्ट्र बैंकको प्रतिवेदनमा उल्लेख छ ।

त्यस्तै सोही अवधिमा उत्तर अमेरिका बाहेक विश्वका अन्य क्षेत्रका मुलुकहरूबाट २०.२४ प्रतिशत रेमिट्यान्स भित्रिएको थियो भने उत्तर अमेरिकाबाट १३.२५ प्रतिशत रेमिट्यान्स भित्रिएको थियो ।

राष्ट्र बैंककाअनुसार पछिल्लो समयमा बैंक तथा फाइनान्सियल संस्थाबाट रेमिट्यान्स भित्रिने परिमाणमा वृद्धि हुँदै गएको छ ।