काठमाडौं– प्रधानमन्त्री कप एकदिवसीय राष्ट्रिय क्रिकेट प्रतियोगितामा नेपाल पुलिस क्लबले लगातार पाँचौँ जित हासिल गरेको छ ।  

सिद्धार्थनगर क्रिकेट मैदानमा सोमबार भएको खेलमा पुलिस क्लबले सुदूरपश्चिम प्रदेशलाई ६१ रनले पराजित गरेको हो । १ सय ६१ रनको लक्ष्य पछ्याएको सुदूरपश्चिम २८ दशमलव ३ ओभरमा ९९ रनमा समेटियो । सुदूरपश्चिमका लागि शेर मल्लले सर्वाधिक ३२ रन जोडे । 

मिलन बोहोरा ४३ बलमा २ चौकाको सहयोगमा २३ रन बनाए । पुलिसका लागि ललित राजवंशीले ६ विकेट लिए । त्यसअघि टस जितेर पहिले ब्याटिङ गरेको पुलिस ४७ ओभरमा १ सय ६० रनको योगफलमा समेटिएको थियो । पुलिसका लागि कप्तान दीपेन्द्रसिंह ऐरीले सर्वाधिक ४२ रन बनाए ।

त्यस्तै रुपन्देहीको एक्स्ट्रा टेक ओभलमा भएको खेलमा एपिएफ क्लबलाई ३ विकेटले हराउँदै त्रिभुवन आर्मी क्लबले पनि लगातार पाँचौँ जित निकालेको छ । १ सय ४२ रनको लक्ष्य आर्मीले ४२ दशमलव ५ ओभरमा ७ विकेट गुमाएर पूरा गर्‍यो । त्यसअघि टस हारेर ब्याटिङको निम्तो पाएको एपिएफ ४२ दशमलव ३ ओभरमा १ सय ४१ रनमा अल आउट भएको थियो ।

त्यस्तै दाङको लमहीस्थित देउखुरी क्रिकेट मैदानमा भएको खेलमा लुम्बिनी प्रदेशले मधेश प्रदेशलाई ८३ रनले पराजित गर्‍यो । लुम्बिनीले दिएको १ सय ५९ रनको लक्ष्य पछ्याएको मधेश २६ दशमलव ५ ओभरमा ७५ रनमा समेटियो । त्यसअघि टस हारेर ब्याटिङको निम्तो पाएको लुम्बिनी प्रदेश ४६ ओभरमा १ सय ५८ रनमा समेटिएको थियो ।