काठमाडौं – पाकिस्तानमा स्तन क्यान्सरका लागि प्रयोग हुने अधिकांश औषधि निष्प्रभावी रहेको पाइएको छ । कराँची विश्वविद्यालयको जामिलुर रहमान जिनोमिक रिसर्च सेन्टरले गरेको अध्ययनमा स्तन क्यान्सरका लागि प्रयोग हुने केमोथेरापीका आयातित औषधि निष्प्रभावी रहेको पाइएको हो ।

पश्चिमा मुलुकबाट आयात हुने यस्ता औषधि पश्चिमा मुलुकका मानिसहरुमा परीक्षण हुने गरेको जनाइएको छ । पाकिस्तानी नागरिकको जेनेटिक बनावट पश्चिमा मुलुकका नागरिकको भन्दा फरक हुने भएकाले यस्ता औषधिको प्रभावकारितामा असर परेको जनाइएको छ ।

पाकिस्तानबाट प्रकाशित हुने द एक्सप्रेस ट्रिब्युनका अनुसार पाकिस्तानमा प्रयोग हुने क्यान्सरका अधिकांश औषधि पश्चिमा मुलुकका उत्पादन र परीक्षण हुने गरेको छ । पाकिस्तानमा क्यान्सर दर उच्च रहेको बताइन्छ । त्यहाँ प्रायः ३० देखि ४५ वर्ष उमेर समूहका महिलामा स्तन क्यान्सर धेरै देखिन्छ ।