काठमाडौं– राजावादीले गरेको शक्ति प्रदर्शनलाई ‘काउन्टर’ दिन विरोध सभाको तयारी गरिरहेको समाजवादी मोर्चा, नेपाल बुद्धिजीवी तथा नागरिक समाजका अगुवाहरूसँग परामर्शमा जुटेको छ । 

शाह वंशीय अन्तिम राजा ज्ञानेन्द्र शाहलाई फेरि तेस्रोपल्ट राजा बनाउने भन्दै सक्रिय हुन थालेपछी समाजवादी मोर्चा कुपण्डोलस्थित होटल हिमालयमा बुद्धिजीवी तथा नागरिक समाजका अगुवाहरूसँग परामर्शमा जुटेको हो । 

बुद्धिजीवी र नागरिक समाजसँगको परामर्श सम्पन्न भएलगत्तै मोर्चाले आजै (शनिबार) पत्रकार सम्मेलन गरेर चैत १५ का लागि तय गरिएको बृहत् विरोध सभाबारे जानकारी दिने तयारी गरेको छ ।

राजावादीका पछिल्ला गतिविधिबाट झस्किएका नेकपा (माओवादी केन्द्र), नेकपा (एकीकृत समाजवादी), नेपाल कम्युनिस्ट पार्टी (नेकपा) र नेपाल समाजवादी पार्टी (नेसपा)ले गठन गरेको मोर्चाले यसअघि नै बृहत् विरोध सभाको घोषणा गरिसकेको थियो । 

पुष्पकमल दाहाल ‘प्रचण्ड’ नेतृत्वको माओवादी, माधवकुमार नेपाल नेतृत्वको एकीकृत समाजवादी, नेत्रविक्रम चन्द (विप्लव) नेतृत्वको नेकपा र महेन्द्र राय यादव नेतृत्वको नेसपाले संयुक्त मोर्चा बनाएर गतिविधिहरू गर्दै आएका छन् ।