काठमाडौं– नेपाली कांग्रेस र नेपाल कम्युनिस्ट पार्टी (नेकपा)का विद्यार्थी सङ्गठनहरूले बझाङको सुनकुडा क्याम्पसका निर्वाचन अधिकृत हिक्मत बहादुर स्याडालाई पदमुक्त गर्न माग गरेका छन् ।

क्याम्पसमा लगाइएको ताला खोल्ने वातावरण निर्माण नगरी निर्वाचन अधिकृत स्याडा अराजक ढङ्गबाट एकलौटी तरिकाले अगाडि बढेको दाबी गर्दै नेविसंघ र अखिल समाजवादीले राजीनामा माग गरेका हुन् ।

दुवै संगठनले यसअघि फागुन २९ मा निर्वाचन अधिकृत स्याडाले त्रिविको निर्देशिका बमोजिम निर्वाचन प्रक्रिया अघि नबढाएको भन्दै क्याम्पसमा तालाबन्दी गरेका थिए ।

स्याडाले नेविसंघ र अखिल समाजवादीले लगाएको तालाबन्दी खुलाएर निर्वाचन प्रक्रिया अघि बढाउन छलफल नै नगरेको भन्दै दुवै सङ्गठनले विज्ञप्ति जारी गरेर उनलाई पदमुक्त गर्नुपर्ने माग अघि सारेका हुन् ।

‘हिक्मतबहादुर स्याडालाई निर्वाचन अधिकृतबाट हटाएर त्रिविको निर्देशिका बमोजिम निर्वाचन प्रक्रिया अगाडि बढाउनका साथै निज हिक्मतबहादुर स्याडा क्याम्पसको आंशिक शिक्षक र राजनीतिक आडमा निर्वाचन अधिकृत भएको कुरा प्रष्ट छ,’ विज्ञप्तिमा भनिएको छ ।