काठमाडौं– नेकपा माओवादी केन्द्रका सांसद रणेन्द्र बराइलीले सरकारको कार्यशैलीका कारण राजावादीहरू सलबलाएको बताएका छन् । 

मंगलबार प्रतिनिधि सभाको शून्य समयमा बोल्दै उनले सबैभन्दा राम्रो काम गरेको वर्ष विद्युत् प्राधिकरणका निर्देशन कुलमान घिसिङलाई हटाउन खोजेको भन्दै आपत्ति जनाए । 

‘ऊर्जामन्त्रीको अभिव्यक्तिमा लाजले पनि लजाएको छ । जसले विद्युत महसुल उठाउने कुरामा कुलमानलाई हस्तक्षेप गर्छ । उनले भने,  ‘उसैले बक्यौता उठाउन सकेन भनेर कारबाही गर्छ । सबैभन्दा बढी कुलमान घिसिङले काम गरेको वर्ष शून्य मूल्याकंन गर्छ ।’ 

यस्तै उनले सरकारले जनघाती काम गरेर चिहानको चपरीमुनि गएको राजसंस्था प्रेत बनेर सलबलाएको बताए । 

‘सरकारले यस्तै जन घाती गरेर चिहानको चपरीमुनि गएको राजसंस्था प्रेत बनेर सलबलाएको छ । बराइलीले भने, ‘फर्कन त सक्दैन तर भूत पिसाच बनेर सलबलाएको छ ।’