काठमाडौं– चिकित्सा विज्ञान राष्ट्रिय प्रतिष्ठान (न्याम्स) को एमडीरएमएस कार्यक्रम नेपाल प्रहरी अस्पतालमा पनि सञ्चालन हुने भएको छ । 

मंगलबार स्वास्थ्य तथा जनसङ्ख्या मन्त्रालयमा त्यस सम्वन्धी सम्झौँता पत्रमा हस्ताक्षर भएको छ । स्वास्थ्य मन्त्री प्रदीप पौडेलको उपस्थितिमा भएको कार्यक्रम सञ्चालन सम्बन्धी सम्झौता पत्रमा न्याम्सका तर्फबाट शिक्षाध्यक्ष डा.लोचन कार्की र अस्पतालका तर्फबाट मेडिकल डाइरेक्टर सुन्दरप्रसाद होजुले हस्ताक्षर गरेका छन् ।

सोही कार्यक्रममा उपस्थित भएका न्याम्सका उपकुलपति प्रा.डा भुपेन्द्रकुमार बस्नेत र नेपाल प्रहरीका तर्फबाट प्रहरी महानिरीक्षक बसन्तबहादुर कुँवरले सम्झौँता पत्रमा संरक्षकको रुपमा हस्ताक्षर गरेका छन् । न्याम्सले यसअघि पनि अन्य संस्थासँग यसैगरी सम्झौता गर्दै एमडी एमएस कार्यक्रम सञ्चालन गर्दै आएको छ । 

उपकुलपति प्रा.डा बस्नेतले नेपाल प्रहरी अस्पताल २२ औँ संस्था भएको बताए । उनले अब फ्याकल्टीहरु हेरेर कार्यक्रम उपयुक्त कार्यक्रम नेपाल प्रहरी अस्पताललाई दिने बताए ।