काठमाडौं– राप्रपा नेपालका अध्यक्ष कमल थापाले सच्चा लोकतन्त्रवादीले राजा आउँदा आत्तिनु नपर्ने बताएका छन् । 

आज सामाजिक सञ्जालमा थापाले जनताले लोकतन्त्रको विकल्प खोजेको नभइ राजासहितको लोकतन्त्र खोजेको उल्लेख गरेका छन् ।

उनले लेखेका छन्– ‘लोकतन्त्रको विकल्प राजतन्त्र होइन, हुन सक्दैन ।त्यो सबैले बुझेका छन् । जनताले लोकतन्त्रको सट्टा निरङ्कुशता खोजेको होइन। जनताले लोकतन्त्रको विकल्प खोजेको पनि होइन, राजासहितको लोकतन्त्र खोजेको हो।’

थापाले लोकतन्त्रको नाममा हाल कायम छाडातन्त्र, सिण्डिकेटतन्त्र र लुटतन्त्रको विकल्प खोजेको उल्लेख गर्दै मर्यादित र जवाफदेही लोकतन्त्र खोजेको उल्लेख गरेका छन् ।

उनले राजासहितको प्रजातन्त्र विश्वमा सर्वाधिक सफल प्रजातन्त्र मानिएको पनि जिकिर गरे ।

उनले बेलायत, जापान, नर्वे लगायतका कयौँ मुलुकमा राजासहितको प्रजातन्त्र सर्वाधिक सफल प्रजातन्त्र मानिएको बताए ।