काठमाडौं– सञ्चार तथा सूचना प्रविधि मन्त्रीसमेत रहेका सरकारका प्रवक्ता गोकुल बाँस्कोटाले चलचित्र सुरु हुनुभन्दा पहिला राष्ट्रिय गान बजाउनेबारे आफूलाई जानकारी नभएको बताएका छन् ।

मन्त्रिपरिषद बैठकहरुको निर्णय सार्वजनिक गर्न विहीवार आयोजना गरिएको नियमित पत्रकार सम्मेलनमा प्रवक्ता वाँस्कोटाले  फिल्म हलमा राष्ट्रिय गान बजाउने कुरा आफूले पनि हल्ला सुनेको तर त्यो सत्य नभएको बताए ।

‘फिल्म हलमा राष्ट्रिय गान बजाउने कुरा मैले पनि सुनेको छुँ’ मन्त्री बाँस्कोटाले भने,‘फिल्म क्षेत्रको मन्त्रालय यही हो, यस्तो निर्णयबारे मलाई चाँही थाहा छैन ।’

‘पहिला पहिला हावा नचलि पात हल्लदैन भन्थे तर अहिले हावा नलागी पनि पात हल्लने रहेछ,’ मन्त्री बाँस्कोटाले भने,‘राष्ट्रिय गान मर्यादा, स्वतन्त्रता, राष्ट्रिय गौरवको विषय हो । त्यसमा छुट्टै कानूनी प्रवन्ध छ, कहाँ गर्ने कसरी गर्ने भन्ने बारेमा, राष्ट्रिय गान बजाउँनै हुँदैन भन्ने हुँदैन ।’