काठमाडौं – सत्ता साझेदार नेपाली कांग्रेसका महामन्त्री गगनकुमार थापाले नेपाल विद्युत प्राधिकरणका कार्यकारी निर्देशक कुलमान घिसिङसँग सरकारले गरिरहेको ‘किचकिच’प्रति आपत्ति जनाएका छन् ।

कांग्रेस सिन्धुली प्रतिनिधिसभा क्षेत्र नम्बर १ कार्यसमितिले शनिबार बेलघारीमा आयोजना गरेको प्रथम क्षेत्रीय सम्मेलनमा उनले घिसिङसँग सरकारले गरिरहेको ‘किचकिच’प्रति आपत्ति जनाएका हुन् ।

‘ऊर्जा मन्त्रालयअन्तर्गत विद्युत प्राधिकरण छ । मैले बुझ्न सकिरहेको छैन । वद्नियत हो कि, ढंग नपुगेको हो ? ३–४ महिनामा सेवा निवृत्त हुने, निवृत्त भइसकेपछि एउटा उपयुक्त व्यक्ति ल्याउने, संस्थाको नेतृत्व गर्न दिने,’ थापाले भने, ‘एउटा सरकार नै एउटा व्यक्तिको पछि लागिरहेको जस्तो देखिन्छ । किचकिच गरिरहेको देखिन्छ । यस्ता कुराहरू ठीक होइनन् । उपयुक्त हुँदैन ।’

महामन्त्री थापाले मन्त्रीहरू नचाहिने काममा लाग्न नहुने र लागेको देखिए प्रधानमन्त्री केपी शर्मा ओलीले रोक्नुपर्नेमा पनि जोड दिए । ‘नचाहिने काममा कोही मन्त्री पनि लाग्नु हुँदैन । मन्त्रीहरू नचाहिने काममा लागे भने त्यसलाई रोक्ने काम प्रधनमन्त्रीको हो,’ उनले भने, ‘प्रधानमन्त्री भनेको क्याविनेटको मास्टर हो । उसले राम्रो कामको श्रेय पनि पाउँछ, नराम्रो कामको अपजस पनि लिनुपर्छ ।’

महामन्त्री थापाले पार्टीको प्रतिनिधित्व गर्दै सरकारमा सहभागी रहेका मन्त्रीहरूलाई सके राम्रो काम गर्न र नसके नराम्रो काम नगरिदिन आग्रह पनि गरे । ‘कि तपाईं राम्रो गर्नुस् । राम्रो गर्न सक्नु हुन्न भने कम्तीमा नराम्रो नगरिदिनुस्,’ उनले भने, ‘५० वटा राम्रो काम गरेको बेलामा एउटा नराम्रो काम भयो भने त्यो नराम्रो कामको हल्लाले सबै राम्रा कामहरू छोपिन्छन् ।’