काठमाडौं – हङकङका २५ वर्षीय स्टार क्रिकेटर अंशुमन रथले राष्ट्रिय टोलीबाट नखेल्ने बताएका छन् । टि–ट्वान्टी विश्वकप छनोटको तयारीमा रहेको हङकङबाट अब नखेल्ने रथले जनाएका छन् ।

अक्टोबरमा यूएईमा हुने छनोटका लागि सार्वजनिक भएको नामावलीबाट पनि रथले आफ्नो नाम फिर्ता लिएको इमर्जिङ क्रिकेटडटकमले उल्लेख गरेको छ ।

रथले विदेशमा अवसर खोज्ने भन्दै राष्ट्रिय टोलीबाट छाड्ने निर्णय गरेको भन्दै हङकङ क्रिकेट बोर्डले उनले टोली छाडेको पुष्टि गरेको छ ।

क्रिकेट सम्बन्धी अनलाइन समाचार पोर्टल इमर्जिङ क्रिकेटले रथले भारतमा व्यवसायिक क्रिकेट खेल्ने लक्ष्यसहित टोली छाडेको जनाएको छ । रथको परिवार भारतको उडिसाबाट हङकङ बसाई सरेको हो । उनका बुबा भारतीय भएपनि उनी हङकङमै जन्मिएका हुन् ।

रथले आफूलाई अवसर दिएकोमा हङकङ क्रिकेट बोर्डलाई धन्यवाद भनेका छन् । तर, उमेरसमूह देखि सिनियर टोलीसम्म हुँदै कप्तान रहेका रथले आगामी दिनका लागि हङकङको टोलीलाई शुभकामना समेत दिएका छन् ।

रथले उमेर समूह हुँदै हङकङबाट १८ एकदिवसीय अन्तर्राष्ट्रिय क्रिकेट खेल खेलेका छन् । यस्तै २० टि–ट्वान्टी खेल खेलेका छन् । भारतीय भए पनि उनी हङकङमै जन्मिएका हुन् । भारत फर्किने सम्भावना रहेको जनाएको इमर्जिङ क्रिकेटले उनले रणजि ट्रफि खेल्ने सम्भावना रहेको जानकारि दिएको छ ।