जलेश्वर – मिथिला मध्यमा परिक्रमाका भक्तजनको सुविधाका लागि नेपाल–भारत खुला सीमा संवाद समूह र क्लोथ बैंक नेपाल, धनुषाको संयुक्त आयोजनामा मठियानीमा ‘हेल्प डेस्क’ सञ्चालन गरिएको छ ।

उक्त हेल्प डेस्कबाट दुई हजारभन्दा बढी श्रद्धालुले सेवा लिएका थिए । सो अवसरमा भक्तजनलाई पानी र चिया वितरण गरिनुका साथै व्यवस्थित यात्राबारे जानकारी समेत दिइएको हेल्प डेस्क संयोजक दिपक यादवले जानकारी दिए ।

नेपाल र भारतको एतिहासिक तथा पौराणिक सम्बन्ध, परिक्रमाको महत्व तथा खुला सीमाको अपरिहार्यता र अनिवार्यताबारे नेपाल–भारत खुला सीमा संवाद समूहका अध्यक्ष डा राजीव झाले जानकारी दिएका थिए ।

कार्यक्रममा संस्थाका अध्यक्ष डा झासहित कार्यक्रम संयोजक यादव, राष्ट्रीय मुक्ति पार्टीका नेता विनोदकुमार ठाकुर, क्लोथ बैंक नेपालका धनेश्वर ठाकुर, कृष्णकुमार साह र खुला सीमा संवाद समूहका मधुवनी प्रतिनिधि विपिन झालगायतको उपस्थिति रहेको थियो ।

हेल्प डेस्कको उक्त सेवा परिक्रमाका क्रममा अन्य बासाहरु मडै, ध्रुबकुण्ड, कञ्चनवन, पर्वता, धनुषाधाम, औरहीलगायतका स्थानमा पनि जारी रहने बताइएको छ ।