सुनसरी- नेपाली कांग्रेसका सभापति शेरबहादुर देउवाले विकासका काममा कांग्रेस सदैव अग्रसर रहेकाले आउँदो उपनिर्वाचनमा आफ्नो पार्टीलाई जिताउन आग्रह गरेका छन् ।

सुनसरीको धरान उपमहानगरपालिकामा बीपी चिन्तन प्रतिष्ठानले बुधबार आयोजना गरेको कार्यक्रममा सभपाति देउवाले देशभरी कांग्रेसले जितेका नगर र गाउँपालिकामा विकासको लहर देखिएकाले धरानमा पनि कांग्रेसले जित्नुपर्नेमा जोड दिए ।

उनले राणाशासन र पञ्चायतजस्ता एकदलीय निरङकुशताका विरुद्ध विगतमा नेपाली काङग्रेसले लडेको स्मरण गर्दै आफ्नो पार्टी सङ्घीयता र लोकतन्त्रका पक्षमा सदैव लागिरहने र कसैसँग सम्झौता समेत नगर्ने धारणा व्यक्त गरे ।

सभापति देउवाले जनताको बोल्न र लेख्न पाउने अधिकारलाई कहि कतैबाट कुण्ठित गर्न नहुने चर्चा गर्दै काङग्रेस सदैव स्वतन्त्रता र जनताको अधिकारका पक्षमा रहनेसमेत बताए ।

पार्टीका उपसभपाति विजयकुमार गच्छादारले पार्टीभित्र एकता कायम गरी आउँदो निर्वाचनमा कांग्रेसका पक्षमा जनमत सिर्जना गर्न आग्रह गरे ।