एजेन्सी– उत्तर कोरियाली सर्वोच्च नेता किम जोङ उनले अमेरिकी राष्ट्रपति डोनाल्ड ट्रम्पसँग दोश्रो शिखर वार्ता गर्नका लागि भियतनाम भ्रमणमा जान रेलयात्रा शुरु गरेका छन् ।

रुसी समाचार संस्था तासले जनाएअनुसार सर्वोच्च नेता किमले शनिबार स्थानीय अनुसार बेलुकी ५ बजे भियतनाम जानका लागि राजधानी प्योङयाङबाट उच्च सुरक्षासहितको रेल चढेका हुन् । उनी चीनको बाटो भएर भियतनाम जाने जनाइएको छ ।

उनी दुई दिनको भ्रमणपछि भियतनाम पुग्नेछन् । उनले त्यहाँ आगामी २७ र २८ फेब्रुअरीमा अमेरिकी राष्ट्रपति डोनाल्ड ट्रम्पसँग शिखर वार्ता गर्ने कार्यक्रम छ ।

त्यसअघि भियतनामको विदेश मन्त्रालयले उत्तर कोरियाली सर्वोच्च नेता भियतनाम आउन लागेको औपचारिक घोषणा गरेको थियो ।