बेइजिङ– चीनको दोश्रो ठूलो अनलाइन शपिङ कम्पनी अलिबाबाका अध्यक्ष एवं चीनका अर्बपति ज्याक माले कम्पनीको पदबाट राजीनामा दिएका छन् ।

५५ वर्षको उमेर पुगेपछि राजीनामा दिने यसअघिको घोषणा अनुसार ५५ औं जन्मदिनको अवसरमा माले मंगलबार कम्पनीको पदबाट राजीनामा दिएका हुन् । यद्यपि उनी अलिबाबा पार्टनरसिपको सदस्यका रुपमा भने कम्पनीमै रहनेछन् ।

विगतमा अंग्रेजी शिक्षक रहेका माले सन् १९९९ मा अलिबाबा इ–कमर्श अनलाइन सेवा शुरु गरेका थिए । शुरुमा यो कम्पनीले चिनियाँ निर्यातक र अमेरिकी खुद्रा व्यापारीलाई जोड्ने पुलको रुपमा काम गर्दथ्यो ।

चीनको बढ्दो उपभोक्ता बजारलाई शुरुका दिनमा केन्द्रित गरेपनि पछि यस कम्पनीले अनलाइन बैंकिङ, मनोरञ्जन र कम्प्युटिङका क्षेत्रमा लगानी बढाएको थियो ।

ज्याक माको स्थानमा कम्पनीका प्रमुख कार्यकारी अधिकृत (सिइओ) डानियल झाङ नियुक्त हुने सम्भावना रहेको अन्तर्राष्ट्रिय सञ्चारमाध्यमले जनाएका छन् । ४० अर्ब अमेरिकी डलर सम्पत्ती रहेका मा चीनका सर्वाधिक धनाढ्य व्यक्ति हुन् ।

उनले अब आफ्नो बाँकी जीवन परोपकारको क्षेत्रमा व्यतित गर्ने बताइएको छ ।