काठमाडौं– अफगानिस्तानमा शासन चलाइरहेको तालिबानले भारतको राजधानी नयाँ दिल्लीस्थित अफगान राजदूतावासको व्यवस्थापन सम्हाल्ने तयारी थालेको छ । भारतबाट प्रकाशित हुने द विकका अनुसार यसबारे भारतीय अधिकारीसँग तालिबानले छलफल शुरु गरेको छ ।

तालिबानले नजिब शहिनलाई भारतका लागि नयाँ अफगान राजदूत तोक्ने तयारी गरिरहेको समाचारमा जनाइएको छ । नजिब तालिबानका वरिष्ठ कूटनीतिज्ञ सुहेल शहिनका छोरा हुन् । सुहेलले कतारको राजधानी दोहामा आफ्नो समूहको प्रतिनिधित्व गर्दै आएका थिए ।

भारतको राजधानीमा अफगानिस्तानले राजदूतावाससँगै हैदरावाद र मुम्बईमा नियोग पनि सञ्चालन गर्दै आएको छ । सन् २०२१ मा सत्ता कब्जा गरेसँगै तालिबानले अन्तर्राष्ट्रिय जगतमा कूटनीतिक मान्यता पाउन संघर्ष गरिरहेको छ ।