काठमाडौं – भारतको ओडिसाका मुख्यमन्त्री मोहन चरण माझीले कलिंगा इन्स्टिच्युट अफ इन्डस्ट्रियल टेक्नोलोजी (किट) विश्वविद्यालयबाट अपमानपूर्वक कुटपिट गरेर निकालिएका नेपाली विद्यार्थीहरू क्याम्पस फर्कन र पढाइ पुनः सुचारु गर्न आग्रह गरेका छन् ।

नेपाली दूतावासका काउन्सिलर संजीव दास शर्मा र नवीन राज अधिकारीसँग कुरा गर्दै मुख्यमन्त्री माझीले केआईआईटी क्याम्पसमा शान्ति र सामान्यता पुनर्स्थापित हुने आश्वासन दिएका हुन् । उनले प्रकृति लम्सालको मुद्दामा न्याय प्रदान गर्ने प्रतिबद्धता समत व्यक्त गरेका छन् ।

केआईआईटीमा सामान्य अवस्थाको पुनर्स्थापनालाई सुनिश्चित गर्न मन्त्रीद्वय मुकेश महालिङ र सूर्यवंशी सुरज, मुख्य सचिव श्री मनोज आहुजा सहित नेपालका अधिकारीहरूसँग स्टेट गेस्ट हाउसमा छलफल भएको थियो ।

यसका साथै, नेपालकी परराष्ट्रमन्त्री डा. आरजु राणा देउवाले यस विषयमा सूर्यवंशी सुरजसँग फोनमा कुराकानी गरेकी थिइन् ।

आइतबार अपरान्हन रुपन्देहीकी प्रकृति लम्साल होस्टेलमै शंकास्पद अवस्थामा मृत भेटिएपछि आन्दोलित नेपाली विद्यार्थीमाथि ज्यादती भएको थियो । उक्त प्रकरणमा कलेजका महानिर्देशकसहित अहिलेसम्म ६ जना पक्राउ परिसकेका छन् ।