काठमाडौं– नेपाल निजामती कर्मचारी संगठनले संघीय निजामती सेवा ऐन कर्मचारीमैत्री बनाउन माग गरेको छ ।  

हालै काठमाडौंमा सम्पन्न १२ औँ महाधिवेशनले गरेका निर्णय सार्वजनिक गर्न मंगलबार काठमाडौंमा पत्रकार सम्मेलन गर्दै संगठनले संघ, प्रदेश र स्थानीय तहको निजामती सेवा सञ्चालन तथा व्यवस्थापनका लागि संघीय निजामती सेवा ऐन कर्मचारीमैत्री बनाउन माग गरेको हो ।

तीनै तहमा कार्यरत कर्मचारीहरूलाई माथिल्लो पदमा प्रतिस्पर्धा गर्दा उमेरको हद नलाग्ने व्यवस्था हुनुपर्ने, प्रदेश र स्थानीय तहमा समायोजनपछि तह वृद्धि भई अवकाश भएका कर्मचारीको सेवा सुविधा तहबृद्धि भएकै अवस्थाको उपलब्ध गराउन संगठनले माग गरेको छ ।

महाधिवेशनमार्फत उच्चस्तरीय तलब सुझाव आयोगको प्रतिवेदनको सुझाव अनुसार कर्मचारीको तलब भत्ता लगायतका सेवा सुविधा आगामी बजेटबाट कार्यान्वयनमा ल्याउन सरकारसँग माग गरिएको संगठनका महासचिव रामचन्द्र अधिकारीले जानकारी दिए ।  

महाधिवेशनले भवानी न्यौपाने दाहालको अध्यक्षतामा १ सय ७१ सदस्यीय नयाँ कार्यसमिति समेत चयन गरेको संगठनले जनाएको छ ।