काठमाडौं– सांसद रंगमति शाहीले सरकार आफ्ना कुनै पनि दायित्व निर्वाह गर्न प्रभावकारी रुपमा प्रस्तुत हुन नसकेको आरोप लगाएकी छन् ।

मंगलबार प्रतिनिधिसभाको विशेष समयमा बोल्दै कांग्रेस सांसद शाहीले शान्ति सुरक्षा, राजश्व असुली, जनताका न्यूनतम आधारभूत आवश्यकताको सर्वसुलभ आपुर्ति लगायत कुनै पनि क्षेत्रमा सरकारले प्रभावकारी रुपमा उपस्थिति जनाउन नसकेको टिप्पणी गरिन् ।

साइकलमा स्याउ बेच्नेलाई कर लगाउने सरकारले एनसेलसँग कर असुली गर्न नसकेको सांसद शाहीको भनाइ थियो ।

सांसद शाहीले जनताको बीचमा जाँदा सरकारले गरेका कामबारे प्रश्न सोध्ने गरेको भन्दै आफूसँग जनतालाई दिन कुनै जवाफ नभएको टिप्पणी गरिन् ।

‘जनताको बीचमा जाँदा कुन मुख लिएर जाने भनेर हामीलाई चिन्ताको विषय भएको छ । जनताको माझ के सन्देश लिएर जाउँ ?’ सांसद शाहीले भनिन्, ‘प्रधानमन्त्रीले उद्घाटन गरेको पानीजहाज कार्यालयको बोर्ड थन्किएको छ । टिकट काट्नका लागि आव्हान गर्नुहुन्छ । जनता लाईनमा छन् । जनताले टिकट पाएका छैनन भनेर जाम कि ? मेलम्चीको पानी बगेर काठमाडौंका खाल्डा खुल्डीमा पानी भरिएको छ । ती खाल्डामा पानी जहाज चलेका छन् भनेर सन्देश लिएर जाउ कि ?’