‍एजेन्सी– अमेरिकी राष्ट्रपति डोनाल्ड ट्रम्पले क्यानाडाका लागि अमेरिकी राजदूत केली क्राफ्टलाई संयुक्त राष्ट्रसंघका लागि अमेरिकी राजदूतमा नियुक्त गरेका छन् ।

केन्टकी राज्यकी क्राफ्टलाई केन्टकी राज्यकै सिनेटर तथा सिनेटमा बहुमत नेता मिच मक्कोन्नलको सिफारिसमा संयुक्त राष्ट्रसंघका लागि राजदूतमा नियुक्त गरेका हुन् ।

क्राफ्टले शुक्रबार ह्वाइट हाउसमा राष्ट्रपति डोनाल्ड ट्रम्प, विदेशमन्त्री माइक पोम्पेओ तथा राष्ट्रिय सुरक्षा सल्लाहकार जोन बोल्टनसँग भेटवार्ता गरेकी छिन् ।

उनले औपचारिक रुपमा जिम्मेवारी सम्हाल्नुअघि कङ्ग्रेसमा उनको सुनुवाई हुनेछ ।

चार महिनाअघि संयुक्त राष्ट्रसंघका लागि तत्कालिन राजदूत निक्की हेलीले राजीनामा दिएपछि राष्ट्रपति ट्रम्पले नयाँ राजदूतको खोजी गरिरहेका थिए । यद्यपि संयुक्त राष्ट्रसंघका लागि नयाँ अमेरिकी राजदूतले मन्त्रिपरिषद्मा मन्त्रीको दर्जा भने नपाउने जनाइएको छ ।