काठमाडौं– नेपाल राष्ट्र बैंकले यातायात समिति तथा व्यवसायीहरुको रोक्का रहेका बैंक खाता फुकुवा गर्न बैंक तथा वित्तीय संस्थाहरुलाई निर्देशन दिएको छ ।

सरकारले यातायात समितिहरु खारेज गर्दै कम्पनीमा दर्ता गर्नु पर्ने निर्णय गरेपछि यातायात समिति तथा व्यवसायीहरुको बैंक खाता रोक्का गरिएको थियो ।

यातायात क्षेत्रमा भएको सिण्डिकेट तोड्न सरकारले गरेको यो निर्णयसँगै यातायात समितिहरु खारेज भएर कम्पनीमा दर्ता भएपछि राष्ट्र बैंकले रोकिएका खाता फुकुवा गर्न भनेको हो ।

अर्थमन्त्रालयले २०७५ वैशाख २३ गते दुई सय ४३ वटा यातायात समितिहरुको बैंक खाता रोक्का गर्न राष्ट्र बैंकलाई पत्राचार गरेको थियो । राष्ट्र बैंकको निर्देशनपछि बन्द भएका सबै खाता खुलाउन गत साउन १६ गते मन्त्रिपरिषद्ले नै निर्णय गरेको राष्ट्र बैंकले जानकारी दिएको छ ।

यसबारे अर्थमन्त्रालयको वित्तीय क्षेत्र व्यवस्थापन तथा संस्थान समन्वय महाशाखाले गत १२ गते पत्राचार गरेपछि बैंक खाता फुकुवा गर्न पत्राचार गरिएको राष्ट्र बैंकले उल्लेख गरेको छ । रोक्का भएका समितिहरुको बैंक खातामा भएको रकम कम्पनीको खातामा परिवर्तन गर्ने गरी राष्ट्र बैंकले फुकुवा गरेको हो ।

अर्थको पत्राचारपछि प्रदेश नम्बर १ का ३२, प्रदेश २ का १०, प्रदेश ३ का ११८, प्रदेश ४ का २४, प्रदेश ५ का ४०, प्रदेश ६ का १२ र प्रदेश ७ का ९ गरी २४३ वटै समितिका बैंक खाता राष्ट्र बैंकले बन्द गर्न निर्देशन दिएको थियो ।