धरान– स्थानीय उत्पादनको प्रवर्द्धन, व्यवसायलाई चलायमान बनाउन र आन्तरिक पर्यटनलाई वृद्धि गर्ने उद्देश्यसहित धरानमा विजिनेश एक्स्पो हुने भएको छ । धरानको शिक्षा, स्वास्थ्य, पर्यटन, उद्योग र सञ्चार क्षेत्रको विकास र सम्भावनाका बारेमा अन्तरक्रिया कार्यक्रमसमेत गरिने नेपाल उद्योग तथा व्यवसायी महासंघका अध्यक्ष शिवराज श्रेष्ठले जानकारी गराएका छन् । 

शनिबारदेखि सुरु हुने ‘विजिनेश एक्स्पो धरान २०८१’ मा सर्वसाधारणलाई निःशुल्क प्रवेशको व्यवस्था हुने एक्स्पो समितिका संयोजक राजेश अग्रवालले जानकारी दिए । भन्छन्, ‘सांस्कृतिक कार्यक्रममा कलाकारको उपस्थिति अनुसार न्यूनतम शुल्क तोकिएको भए पनि अन्य समयमा कुनैपनि प्रकारको शुल्क छैन । 

आम सर्वसाधारणको अवस्थालाई मध्यनजर गर्दै सस्तो जुत्ता मेला, आदिवासी जनजातिको परिकार, स्थानीय उद्योगीका उत्पादन सुपथ मूल्यमा उपलब्धता गराउने समितिका संयोजक टंककुमारी गुरुङले बताइन् । साथै, उनले सांस्कृतिक कार्यक्रममा राष्ट्रिय कलाकारहरू राजेश पायल राई, सुगम पोख्रेल, मिलन नेवार, तृष्णा गुरुङ लगायत स्थानीय कलाकारहरूको प्रस्तुति रहने बताइन् । 

गुरुङ थप्छिन्, ‘लोकबाजाहरूको अर्केष्ट्रा, ब्रिटिस गोर्खा ब्रिगेड ब्यान्डको प्रस्तुति र स्थानीय डान्स सेन्टरहरूको प्रस्तुति रहनेछ । अर्को मनोरञ्जनका लागि खेल तमासा, रोटेपिङ, नाउँ तथा बालबालिकाहरूका लागि समेत मनोरञ्जनात्मक सामग्रीहरू राखिएको छ ।’

एक्स्पो कोशी प्रदेशका मुख्यमन्त्री हिक्मत कार्कीबाट शुभारम्भ हुने आयोजकले जनाएको छ । साथै, कार्यक्रम धरान रंगशालामा फागुन १० गतेसम्म सञ्चालन हुने पनि जनाएको छ ।