काठमाडौं- जनता समाजवादी पार्टी नेपालको केन्द्रीय कार्यकारिणी समिति बैठक आइतबार दोस्रो पनि जारी छ ।

पार्टी केन्द्रीय कार्यालय बालकुमारीमा शनिबारदेखि सुरु भएको बैठकमा बिषयगत छलफल भइरहेको छ ।

बैठकमा पार्टी केन्द्रीय अध्यक्ष उपेन्द्र यादवले पेस गरेको एजेन्डामा केन्द्रित छलफल भइरहेको अध्यक्ष यादवको सचिवालयले जनाएको छ ।

कार्यकारिणी समितिको बैठकमा खासगरी पार्टी सुदृढीकरणका लागि चार महिनादेखि केन्द्रदेखि वडासम्मै जारी संगठन विस्तार अभियानको समीक्षा हुँदैछ ।

‘जनतासँग जसपा नेपाल, आधारभूत संगठन निर्माण’ नाममा चार महिनादेखि जारी अभियानको समीक्षा मुख्य एजेन्डा रहेको सचिवालयले जनाएको छ । दुई दिने बैठकको पहिलो दिन कार्यकारिणी समितिका २३ सदस्यले अभियानसम्बन्धी रिपोर्ट प्रस्तुत गरेका थिए ।

बाँकी सदस्यले बैठकको दोस्रो दिन आ–आफ्नो जिम्मेवारी र तोकिएको कार्यक्षेत्रको प्रगति विवरण प्रस्तुत गर्दैछन् । यसअघि उक्त अभियानको समयावधि दुई महिना थपी माघ मसान्तसम्मलाई थप गरिएको थियो ।

मधेस केन्द्रित ८ दलको बन्दै गरेको मोर्चा, सरकारले ल्याएको अध्यादेश र ताप्लेजुङमा चलिरहेको ‘नो केबलकार आन्दोलन’ लगायत बैठकका मुख्य एजेन्डा हुन् ।

वर्तमान अवस्थामा पार्टी संठन निर्माणलाई तीव्रता दिने उपायबारे बैठकमा कार्यकारिणी सदस्यहरूले धारणा राखिरहेका छन् । दुई दिनदेखि जारी बैठक आइतबार नै सम्पन्न हुँदैछ ।