म्याग्दी- एउटा सहकारीबाट डेढ अर्ब रुपैयाँभन्दा धेरै हिनामिना भएको प्रकरणमा जिल्ला समन्वय समिति (जिसस) म्याग्दीका प्रमुख राजकुमार थापा पक्राउ परेका छन् ।

थापासहितका सञ्चालकहरूमाथि म्याग्दी सदरमुकाम बेनीस्थित कुमारी बहुउद्देश्यीय सहकारी संस्थाको डेढ अर्ब रुपैयाँ बचत हिनामिना गरेको अभियोग छ ।

नेकपा (एमाले) का नेतासमेत रहेका उनी २०७९ को स्थानीय तह निर्वाचनपछि जिसस म्याग्दीको संयोजक बनेका थिए ।

जिसस म्याग्दीका संयोजक थापासहितविरुद्ध सहकारी ठगी प्रकरणमा ०८१ जेठमा उजुरी परेको थियो । बचत अपचलनबारे सहकारी रजिस्ट्रारको कार्यालय, गण्डकीले छानबिन गरेको थियो ।

उक्त कार्यालयको छानबिन प्रतिवेदनले थापा नेतृत्वको समितिले सर्वसाधरणको बचत अपचलन गरेको जनाएको थियो । प्रतिवेदनमा थापालाई सहकारी ठगीका मुख्य योजनाकार भनेर किटान गरिएको छ।

थापासहितको टोलीले सहकारीको रकम अपचलन गरी ढुकुटी खेलाएको आरोप पनि लागेको छ । थापाले सहकारीको बचत निजी स्कुल र घरजग्गामा लगानी गरेको खुलेको छ ।

उक्त सहकारीमा अहिले अध्यक्ष यमबहादुर रोका छन् । उनैले सहकारीको हिसाबकिताब छानबिन मागसहित ०८१ जेठमा सहकारी रजिस्ट्रारको कार्यालयमा निवेदन दिएका थिए ।

उक्त सहकारीमा थापा दुई कार्यकाल सचिव र ०७९ मा जिसस प्रमुख बन्नुअघिसम्म उपाध्यक्षको भूमिकामा थिए ।

एमाले नेता थापा बेनी बजारस्थित बुद्ध एकेडेमीका सञ्चालक पनि हुन् । उनले कुमारी सहकारीबाट बिनाधितो उक्त विद्यालमा १६ करोड रुपैयाँ लगानी गरेको पनि खुलेको छ। थापासहितको समूहले सहकारीको बचत बिनाधितो निकालेर जग्गा किनेको पनि खुलेको छ ।