काठमाडौं – भारतले इंग्ल्याण्डसँगको टी-२० शृङ्खला जितेको छ। पुनेमा शुक्रबार भएको चौथो टी-२० मा भारत १५ रनले विजयी भएको हो। यस अघिका तीन खेलमा २ मा भारत तथा एकमा इंग्ल्याण्ड विजयी भएका थिए।

भारतले दिएको १८२ रनको लक्ष्य पछ्याएको इंग्ल्याण्ड २ बल बाँकी रहँदा सम्पूर्ण विकेट गुमाउँदै १६६ रनमा सीमित भयो।

फिल साल्ट र बेन डकेटले पहिलो विकेटका लागि ६६ रन बनाएपछि जिततर्फ अग्रसर इंग्ल्याण्डलाई ध्वस्त गर्ने काम भारतका रवि विस्नोइ र हर्षित रानाले गरे। १९ बलमा ३९ रन बनाएका डकेटलाई विस्नोइले आउट गरेपछि इंग्ल्याण्डको पतन सुरु भएको थियो। विस्नोइले ४ ओभरमा २८ रन खर्चेर ३ विकेट लिए। हर्षित रानाले ४ ओभरमा ३३ रन खर्चेर ३ विकेट लिए।

इंग्ल्याण्डका लागि साल्टले २३ रन जोडे। हेरी ब्रुकले २६ बलमा ५१ रन जोडे। उनको पारीमा ५ चौका र २ छक्का समावेश थियो।

यसअघि टस हारेर पहिले ब्याटिङ गरेको भारतले ९ विकेटको क्षतिमा १८१ रन बनाएको थियो। १२ रनमा ३ तथा ५७ रनमा चार विकेट गुमाइ सकेको भारतलाई जित दिलाउने क्रममा शिवं दुवे र हार्दिक पाण्डेले शानदार ब्याटिङ गरे। दुवैले समान ५३ रन जोडे। ३४ बलको सामना गरेका दुवेले ७ चौका र २ छक्का प्रहार गरे। ३० बलको सामना गरेका पाण्डेले ४ चौका र ४ छक्का प्रहार गरे।

दोस्रो ओभरमा नै सकिव मोहम्मदले मेडन सहित ३ विकेट लिएपछि भारत सुरुवातमा नै कमजोर भएको थियो। अभिषेक शर्माले भने १९ बलमा २९ रन जोडे। रिंकु सिंहले ३० रन जोडे।