काठमाडौं– मधेश केन्द्रित ८ दलीय मोर्चाको कार्यदलले आचारसंहिताका साथै एजेण्डा बनाउन ड्राफ्ट कमिटी गठन गरेको छ ।

सिंहदरबारमा शुक्रबार बसेको कार्यदल बैठकले मधेश केन्द्रित ८ दलीय मोर्चाको नाम, एजेण्डा, आचारसंहिता लगायत बनाउनका लागि तीन सदस्यीय ड्राफ्ट कमिटी गठन गर्ने निर्णय गरेको लोसपाका नेता लक्ष्मणलाल कर्णले जानकारी दिए ।

ड्राफ्ट कमिटीले खाका तयार गरेपछि कार्यदलमा छलफल गरेर पारित गर्ने उनले बताए  । कार्यदलबाट पारित भएपछि मधेश केन्द्रित ८ को शीर्ष तहमा प्रस्तुत गरी आवश्यक निर्णय लिइने कर्णले बताए ।  

यसअघि बिहीबार बसेको मधेश केन्द्रित ८ राजनीतिक दलको बैठकले सहकार्यको वातावरण निर्माण गर्न र मोर्चालाई बलियो बनाउन कार्यदल गठन गर्ने निर्णय गरेको थियो । 

कार्यदलमा जसपा नेपालबाट मनिष सुमन, लोसपाबाट लक्ष्मणलाल कर्ण, जनमतबाट डा शरद सिंह यादव, जसपाबाट मोहम्मद इस्तियाक राई, नागरिक उन्मुक्तिबाट गंगाराम चौधरी, जनता प्रगतिशील पार्टीबाट डा शिवजि यादव र तमलोपाबाट ब्रजेस सिंह रहेका छन् ।