काठमाडौं– नेपाली कांग्रेसका सभापति शेरबहादुर देउवाले संविधान संशोधन गर्दा संविधानका आधारभूत विशेषता कमजोर हुन नहुनेमा जोड दिएका छन् । 

उनले बहुलवादमा आधारित बहुदलीय प्रतिस्पर्धासहितको संघीय लोकतान्त्रिक गणतन्त्रात्मक शासन व्यवस्था र समावेशीतालगायतका संविधानका आधारभूत विशेषता कमजोर हुन नहुने जोड दिएका हुन् । 

‘संविधान संशोधनको कुरा गर्दा हामी केही विषयमा स्पष्ट हुन आवश्यक छ,’ प्रतिनिधिसभाको पाँचौँ अधिवेशनको पहिलो बैठक सम्बोधन गर्दै देउवाले भने, ‘संविधान संशोधन गर्दा बहुलवादमा आधारित बहुदलीय प्रतिस्पर्धासहितको संघीय लोकतान्त्रिक गणतन्त्रात्मक शासन व्यवस्था र समावेशीतालगायतका संविधानका आधारभूत विशेषता कमजोर हुनु हुँदैन । 

देउवाले राजनीतिक दलहरूका बीचमा सहमतिका आधारमा संविधान संशोधन गर्नु पर्नेमा जोड दिँदै संविधान संशोधनका लागि आफूहरूले छलफल प्रारम्भ गरी सकेको बताए । ‘हामीले अन्य राजनीतिक दलहरूसँग पनि संवाद, सहमति र सहकार्यका साथ अगाडि बढ्नु पर्दछ,’ उनले भने । 

सभापति देउवाले वर्तमान संविधान प्रारम्भ भएको १० वर्ष भइसकेको भन्दै १० वर्षको अवधिमा संविधानको अभ्यासको समीक्षा गर्ने, संविधान कार्यान्वयनमा देखा परेका सबल र दुर्बल पक्षको अध्ययन र पहिचान गर्ने र आवश्यकताअनुसार संविधान संशोधन वा परिमार्जन गर्नु पर्ने पनि बताए ।