काठमाडौं– सञ्चार तथा सूचना प्रविधिमन्त्री पृथ्वी सुब्बा गुरुङले सरकारी सञ्चार माध्यम समय सापेक्ष परिष्कृत गर्नुपर्ने बताएका छन् ।

नेपाल टेलिभिजनको ४०औँ वार्षिकोत्सव समारोहलाई सम्बोधन गर्दै सञ्चार मन्त्री गुरुङले जनताले सही सूचना पाए मात्र राष्ट्रिय एकता बलियो हुने बताए । 

उनले सार्वजनिक सेवा प्रसारण संस्था (पीएसबी) ले जनताको हितका लागि भूमिका निर्वाह गर्नुपर्ने बताए। पीएसबी कार्यान्वयन गर्न मन्त्रालयले नीतिगत र बजेटको व्यवस्था गर्ने उल्लेख गर्दै उहाँले यसका लागि कर्मचारीले कामको दायित्व बोध गर्नुपर्नेमा जोड दिए । 

‘तपाईँहरू काममा ध्यान दिनुहोस्, नीतिगत संरचना र बजेटको व्यवस्था गर्ने काम म गर्छु’, सञ्चार मन्त्री गुरुङले भने, ‘जनतालाई सहि र तथ्यगत सूचना दिनुहोस् ।’

पीएसबीको प्रभावकारीताका लागि आवश्यक बजेट, नीति र स्रोत जुटाउने उनले उल्लेख गरे । सरकारका प्रवक्तासमेत रहेका मन्त्री गुरुङले नेपाल टेलिभिजन र रेडियो नेपाल गौरवमय इतिहास बोकेका सरकारी सञ्चार माध्यम भए पनि समय सापेक्ष परिष्कृत गर्नुपर्नेमा जोड दिए । 

त्यसै अनुरूप पीएसबी मोडल आएको र यसको भरपुर प्रयोग गरेर जनताको घर घरमा सूचना सेवा पुग्न सके मात्रै यसको सार्थकता साबित हुने बताए । 

‘तीन तहको सरकारबीचको अन्तरसम्बन्ध तथा यर्थाथ सूचना दिई जनतालाई जागरूक गराउनु पीएसबीको मुख्य दायित्व हो’, मन्त्री गुरुङले भने।