काठमाडौं- नाम र कथावस्तु चोरिएको भन्दै चलचित्र ‘एक्टर टेक वान’ विरुद्ध परेको रिटमा जिल्ला अदालत काठमाडौंले अल्पकालीन अन्तरिम आदेश दिएको छ ।

बुधरबादेखि रिलिज हुने तयारीमा रहेको यो चलचित्र अदालतको अल्पकालीन अन्तरिम आदेशसँगै आगामी माघ २२ गतेसम्मलाई प्रदर्शनमा आउन नपाउने भएको छ ।

सम्राट थापाले आफ्नो चलचित्रको नाम र कथावस्तु चोरिएको आरोपसहित रिट हालेका थिए । आफ्नो चलचित्रको कथा चोरिएको भन्दै दिएको रिटमा जिल्ला अदालत काठमाडौंका न्यायाधीश ढाकाराम पौडेलले अल्पकालीन अन्तरिम आदेश दिएका हुन् । थापाले चलचित्र विकास बोर्डलाई पनि विपक्षी बनाएर रिट हालेका थिए ।

अदालतले थापाको मागअनुसार अन्तरिम आदेश नदिई अल्पकालीन आदेश दिँदै दुवै पक्षलाई छलफलका लागि झिकाएको छ । दुवै पक्षसँग माघ २२ गते छलफलपछि अन्तरिम आदेश दिने नदिने कुराको टुंगो अदालतले गर्ने भएको छ।