काठमाडौं – नेपालमा संसद्को विधेयक (हिउँदे) अधिवेशन सुरु हुँदै गर्दा भारतमा पनि आजैदेखि त्यहाँको संसद्को बजेट अधिवेशन सुरु भएको छ ।

आज बिहान ११ बजे सुरु भएको संसद्को बजेट सत्र (सन् २०२५–२०२६)लाई त्यहाँकी राष्ट्रपति द्रौपदी मूर्मूले सम्बोधन गरेकी छिन् । वित्तमन्त्री निर्मला सीतारमणले संसद्को दुबै सदनमा अपराह्नतिर मुलुकको आर्थिक सर्वेक्षण प्रतिवेदन पेश गर्नेछिन् ।

भारतको वार्षिक बजेट (भोलि) शनिबार संसद्मा पेश हुने बीबीसी हिन्दीमा उल्लेख छ । बजेट पेश हुनु अघिल्लो दिन संसद् भवन बाहिर पत्रकारहरूसँग कुरा गर्दै भारतीय प्रधानमन्त्री नरेन्द्र मोदीले आफ्नो तेस्रो कार्यकालको पहिलो बजेट आउने लागेको बताएका छन् ।

मोदीले बेलायती उपनिवेशबाट भारत स्वतन्त्र भएको १०० वर्ष अर्थात् सन् २०४७ सम्म देशलाई विकसित हैसियतमा पुर्‍याउने सङ्कल्प पूरा गर्नेगरी बजेट ल्याइने बताए ।

राष्ट्रपति मूर्मूले मोदी सरकारले एक देश एक चुनाव र वक्फ बोर्ड जस्ता मामिलामा ठूलो कदम उठाएको बताएकी छिन् । साथै, सरकारले एक दशकमा विकसित भारत बनाउने लक्ष्यमा नयाँ ऊर्जा दिएको दाबी गरेकी छिन् ।

संसद् बैठक सुरु हुनासाथ सत्तापक्ष र प्रतिपक्षीबीच वाद–प्रतिवाद भएको छ । यो रस्साकस्सीले भारतको बजेट सत्रमा अनेक चर्काचर्की हुने आकलन छ ।

केरलको वायनाडाकी लोकसभा सांसद् एवम् कांग्रेस नेतृ प्रियङ्का गान्धीले प्रधानमन्त्री मोदीमाथि निशाना साँधिसकेकी छिन् । मोदीले जनताको मुद्दामा कुरा गर्न र जवाफ दिनै नचाहेको बताइन् ।