काठमाडौं- युक्रेनविरुद्धको युद्धमा रूसी सेनाबाट सहभागी एकजना नेपाली युवकको उनका परिवारले कुशको शव बनाएर अन्तिम बिदाइ गरेका छन् ।

ओखलढुंगा स्थायी घर भई कीर्तिपुर नगरपालिका– ४ मा बस्दै आएका विनोदबहादुर सुनुवारको सोमबार पशुपतिनाथ आर्यघाटमा कुशको शव बनाएर अन्त्येष्टि गरिएको हो ।

रुसी सेनामा कार्यरत रहँदा ज्यान गुमाएका सुनुवारको पार्थिव शरीर नेपाल ल्याउन सम्भव भएन । उनको निधनको खबर मात्रै घरपरिवारसम्म आइपुग्यो । विनोदको शवको रुसी सेनाले उतै अन्त्येष्टि गरिसकेको छ ।

त्यहीकारण पशुपति आर्यघाटमा कुशको शव तयार गरेर आफ्नो संस्कृति परम्पराअनुसार परिवारजनले दाहसंस्कार गरेका हुन् ।

 विनोद १७ असोज २०८० मा रुसतर्फ गएका थिए । रुस गएको ७५ दिनदेखि परिवारसँग सम्पर्क थिएन । तीन दिनअघि मात्रै उनको मृत्युको खबर परिवारलाई आएको हो ।

कीर्तिपुरमा बसोबास गर्दागर्दै रुस गएका सुनुवारका २४ वर्षीय श्रीमती सृजना बस्नेत र एक छोरा छन् ।

तस्बिरहरू : नेपाल फोटो लाइब्रेरी