काठमाडौं- नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ ले गोरूजस्तै जोतिएर देश र जनताको सेवा गर्ने इच्छा रहेको बताएका छन् ।

आइतबार काठमाडौंमा आयोजित जनपत्रकार संगठनको कार्यक्रमलाई सम्बोधनका क्रममा उनले यसका लागि २०८४ मा जनताले नेकपाको पक्षमा मत दिनु आवश्यक रहेको बताए । जनताले मत दिएमा काम गर्न सिंहदरबार नै नचाहिने उनले बताए ।

‘०८४ अग्रगमनको पक्षमा व्यक्त हुन्छ, समाजवादको पक्षमा व्यक्त हुन्छ, स्वाधीनताको पक्षमा व्यक्त हुन्छ । नेपाली जनताले अहिलेसम्म प्राप्त नगरेको स्वतन्त्रता र मुक्तिको चाहना छ’, उनले भने, ‘त्यो प्राप्त गर्नेतिर मत व्यक्त हुन्छ भन्ने विश्वास छ । त्यसो भए हामीलाई सिंहदरबार पनि चाहिँदैन । बालुवाटारको करोडौं करोडको खाटमा सुतेर होइन, जनताको झुपडीमा गोरूजस्तो जोतिएर देशको सेवा गर्ने चाहना नेकपासँग छ ।’

नेकपाले आगामी संसदीय निर्वाचनमा भाग लिने निर्णय गरिसकेको सन्दर्भमा विप्लवको यो भनाइ आएको हो । नेकपाले सबैको मित्र बनेर काम गर्ने उनले बताए । नेकपाले देश बेचुवा दलाल र जनता लुटेर खाने माफियाबाहेक सबैसँग सहकार्य गर्ने महासचिव विप्लवले बताए ।

‘नेकपा सबैको मित्र, देश बेचेर खाने दलाल, लिच्चडबाहेक, जनताको सम्पत्ति उडाउने माफियाबाहेक सबैसँग सहकार्य गरेर यो देशलाई अगाडि बढाउन चाहन्छ,’ उनले भने ।

नेपाल गरिब भयो, सकियो भन्ने मात्रै नभएर नयाँ चरणमा प्रवेश गर्दैछ भन्ने सन्देश दिनेगरी काम गर्ने उनले बताए । महासचिव विप्लवले नेपालले काँचुली फेर्ने समय आइरहेको बताउँदै त्यो समयको प्रतिपक्षामा काम गरिरहेको बताए ।