काठमाडौं- राष्ट्रिय प्रजातन्त्र पार्टीका प्रवक्ता ज्ञानबहादुर (ज्ञानेन्द्र) शाहीले जारी केन्द्रीय समितिको बैठक मूल एजेण्डमा केन्द्रित हुन नसकेको बताएका छन् ।

काठमाडौंमा जारी बैठकबारे प्रश्न गर्दै उनले पार्टी नेतृत्वको समेत आलोचना गरेका छन् । ‘कतै राप्रपा केन्द्रीय समितिको बैठक… ‘कामकुरा एकातिर कुम्लो बोकी ठिमितिर’ त भएन ?’, उनले बैठकबारे प्रश्न गरेका छन्।

राष्ट्र र देशवासीको हितका लागि अहिलेको अवस्थामा पार्टीलाई एक ढिक्का बनाएर मूल एजेण्डामा केन्द्रित गर्नुपर्नेमा उनले बताए ।

संविधान संशोधनको विषयमा राजनीतिक दलहरूबीच छलफल चलिरहेकाले राप्रपाले पनि यसबारे धारणा स्पष्ट पार्नुपर्ने शाहीले बताए ।

संविधान संशोधन गराउन दबाबमुलक कार्यक्रम गर्नुपर्ने भन्दै उनले यसका विषय के कस्ता हुन सक्छन् भनेर चर्चा गरेका छन् ।

संविधान संशोधनका एजेण्डाको पहिलो नम्बरमै शाहीले प्रत्यक्ष निर्वाचित कार्यकारी प्रधानमन्त्रीसहितको शासकीय स्वरुपको प्रस्ताव गरेका छन् ।

एकजना व्यक्ति दुई पटकभन्दा बढी प्रधानमन्त्री बन्न नपाउने गरी संविधान संशोधन हुनुपर्नेमा पनि उनले जोड दिएका छन् ।

‘अब जनताबाट प्रत्यक्ष निर्वाचित कार्यकारी प्रधानमन्त्री र दुई कार्यकालभन्दा बढी प्रधानमन्त्री हुन नपाउने व्यवस्था गरिनुपर्छ’, राप्रपाका प्रमुख सचेतक समेत रहेका शाहीले भनेका छन् ।

प्रदेश संरचना, धर्म निरपेक्षता, राष्ट्रपति र राजाबारे जनमत संग्रह जस्ता विषयमा जाने गरी पार्टीले निर्णय लिनुपर्ने उनले बताएका छन् ।

संविधान संशोधनका लागि अन्य एजेण्डासमेत पार्टीले अगाडि बढाउनुपर्नेमा शाहीले जिकिर गरेका छन् ।

‘भ्रष्टाचारीलाई आजीवन कारावास र सम्पत्तिहरण गर्ने कानुन निर्माण तथा संवैधानिक आयोगमा राजनीतिक नियुक्ति बन्द, विदेशमा रहेका नेपालीलाई मताधिकार, युवालाई रोजगारी ग्यारेन्टी संविधान संशोधनका क्रममा समेटिनुपर्छ’, उनले भनेका छन् ।

कर्मचारी र शिक्षकलाई राजनीतिमा निषेध गर्नेगरी आवश्यक व्यवस्था संविधानमै गरिनुपर्नेमा उनको जोड छ । तर, यस्ता एजेण्डामा पार्टीको केन्द्रीय समिति केन्द्रित नभएको भन्दै उनले असन्तुष्टि जनाएका छन् ।

‘हामी अहिले एकअर्कालाई आरोप र प्रत्यारोप गरेर पार्टीको केन्द्रीय समिति बैठकलाई रमिता हेर्ने थलोका रूपमा प्रयोग गरिरहेका छौँ’, उनले भनेका छन्, ‘जो आफैंमा कुनै पनि प्रगति र परिणाम दिने काम होइन ।’