काठमाडौं– राष्ट्रिय स्वतन्त्र पार्टी (रास्वाप)ले संसदीय दलको बैठक आह्वान गरेको छ। बैठक माघ १६ गते बुधबार बिहान ११ बजे पार्टी केन्द्रीय कार्यालय चमतिमा बस्ने बताइएको छ ।

बैठकमा यही माघ १८ गते सुरु हुने संसदको हिउँदे अधिवेशन, समसामयिक राजनीति र रास्वपाले उठाउनु पर्ने मुद्दाहरूका विषयमा छलफल हुने पार्टीका प्रमुख सचेतक सन्तोष परियारले जानकारी दिए ।  

बर्खे अधिवेशनपछि हिउँदे अधिवेशन सुरु हुन लाग्दा पहिलोपटक दलको बैठक बस्न लागेको हो । पार्टी सभापति तथा संसदीय दलका नेता रवि लामिछाने अहिले निलम्बनमा छन् ।

सहकारी ठगी, सङ्गठित अपराध र सम्पत्ति शुद्धीकरण सम्बन्धी मुद्दा चलिरहेका बेला लामिछानेको पद निलम्बनमा परेको हो । पद निलम्बनमा परेपछि अहिलेसम्म रास्वपाले संसदीय दलको नेता चुन्न सकेको छैन । बुधबार बस्ने संसदीय दलको बैठकमा संसदीय दलका उपनेता विराजभक्त श्रेष्ठले संसदीय दलको कार्यवाहक नेताको जिम्मेवारी सम्हाल्ने छन्। श्रेष्ठ २०७४ मा पनि बागमती प्रदेशसभा सदस्य थिए। अहिले काठमाडौंबाट निर्वाचित प्रतिनिधि सभा सदस्य हुन् ।

रास्वपा संसदीय दलको विधानको दफा १३ को उपदफा १ बमोजिम संसदीय दलका उपनेता विराजभक्त्त श्रेष्ठको समन्वयमा दलको बैठक बोलाइएको प्रमुख सचेतक परियारले जानकारी दिए ।