काठमाडौं– भारतले मध्य एशियाली मुलुक किर्गिजस्तानका सेनालाई संयुक्त राष्ट्रसंघीय शान्ति स्थापनासम्बन्धी प्रशिक्षण दिएको छ ।

राजधानी नयाँ दिल्लीमा रहेको संयुक्त राष्ट्रसंघीय शान्ति स्थापना केन्द्रले अनलाइनका माध्यमबाट किर्गिज सेनालाई प्रशिक्षण दिएको हो ।

दुई दिने प्रशिक्षण कार्यक्रममा किर्गिज सेनालाई संयुक्तराष्ट्रसंघीय शान्ति स्थापनासम्बन्धी वृहत जानकारी प्रदान गरिएको भारतीय समाचार संस्था एएनआईले जनाएको छ

अन्तर्राष्ट्रिय शान्ति स्थापनाको क्षेत्रमा भारतीय प्रतिबद्धताअनुसार उक्त प्रशिक्षण कार्यक्रम सञ्चालन गरिएको भारतीय सेनाले जानकारी दिएको छ ।

किर्गिजस्तानले सन् १९९१ अगस्ट ३१ मा स्वतन्त्रता प्राप्त गरेको थियो । सन् १९९२ मार्च १८ मा भारतले किर्गिजस्तानसँग औपचारिक रुपमा द्विपक्षीय कूटनीतिक सम्बन्ध स्थापना गरेको थियो ।

भारत र किर्गिजस्तान रणनीतिक साझेदार हुन् । दुई मुलुकबीच रक्षा, व्यापार, प्रतिआतंकवाद जस्ता क्षेत्रमा सहकार्य रहँदैआएको छ ।