काठमाडौं – एक मेडिकल सञ्‍चालकले सरकारी अस्पतालबाट भुक्तानी पाउन घुस खुवाएर सरकारी साक्षी बन्दै एकाएक बयान फेरेपछि भ्रष्टाचार मुद्दा लागेको छ ।

औषधि सप्लाई गरेबापत पाउनुपर्ने भुक्तानी लिन अप्लस मेडिकोका सञ्चालक नन्दलाल पौडेलले चितवनस्थित वीपी कोइराला मेमोरियल क्यान्सर अस्पतालमा कार्यरत कर्मचारी अमृता कोइरालालाई ६ लाख रुपैयाँ घुस दिएको भेटिएको थियो ।

सो घुस प्रकरण छानबिन क्रममा अनुसन्धान अधिकृतलाई सघाएपछि मेडिकल सञ्चालक पौडेललाई अख्तियार दुरुपयोग अनुसन्धान आयोगले सरकारी साक्षीको रूपमा अदालतमा पेश गरेको थियो ।

भ्रष्टाचार प्रकरणमा घुस लिने र दिने दुबैलाई कारबाही गर्नुपर्नेमा अख्तियारले पौडेललाई अनुसन्धानमा सहयोग गरेको भन्दै सजायमा छुट दिइ सरकारी साक्षीको रूपमा अदालतमा पेश गरेको थियो ।

तर, विशेष अदालतमा पौडेलले अख्तियारलाई नै बुमर्‍याङमा पार्नेगरी उल्टो बकपत्र गरिदिए । उनले आयोगमा अनुसन्धानको क्रममा गरेको बयान ब्यहोराको प्रतिकूल हुनेगरी बकपत्र गरेको पुष्टि भएको आयोगले जनाएको छ ।

आयोगका अनुसार; पौडेलले औषधिको रकम भुक्तानी पाउन क्यान्सर अस्पतालकी कर्मचारी कोइरालालाई नद एक लाख ५० हजार रुपैयाँ र थप चार लाख ५० हजार रुपैयाँको चेक गरी जम्मा ६ लाख रुपैयाँ घुस/रिसवत दिएका थिए ।

उनले बयान फेरेपछि अख्तियार पुनः भ्रष्टाचार मुद्दा लिएर विशेष अदालतमा गएको हो । यसअघि सरकारी साक्षी बसेका कारण सजाय छुट गर्दै अदालतमा पेश गरिएका पौडेलविरुद्ध आयोगले निवारण ऐन, २०५९ को दफा ३ को उपदफा (३) अन्तर्गतको कसुर लगाएको छ ।

निजलाई ६ लाख रुपैयाँ बिगो कायम गरी भ्रष्टाचार निवारण ऐन, २०५९ को दफा ३ को उपदफा (३) ले निर्देश गरेबमोजिम भ्रष्टाचार निवारण ऐन, २०५९ को दफा ३ को उपदफा (१) को देहाय (ङ) बमोजिम कैद सजाय गरी सोही ऐनको दफा ३ को उपदफा (१) अनुसार बिगो बमोजिम जरिवाना माग गरिएको आयोगका प्रवक्ता नरहरि घिमिरेले जानकारी दिए ।

उक्त प्रकरणमा प्रतिवादी अमृता कोइरालाले घुस/रिसवतबापत लिइसकेको ६ लाख रुपैयाँ बिगोसमेत सोही ऐनको दफा ३ को उपदफा (१) बमोजिम जफत हुन पनि आयोगले विशेष अदालतमा मागदाबी गरेको छ ।

घुस लिने कोइराला र दिने पौडेल दुबैविरुद्ध आयोगले आज (बिहीबार) काठमाडौंमा आरोपपत्र दायर गरेको हो ।