काठमाडौं- नेपाली कांग्रेसका सांसद दीपक गिरीले गैरआवासीय नेपाली (एनआरएन) हरूलाई निःशुल्क भिसा दिने प्रावधान गलत रहेको बताएका छन् । सरकारले त्यसलाई सच्याउनु पर्ने पनि उनले उल्लेख गरेका छन् ।

संघीय राजधानी काठमाडौंमा सञ्चारकर्मीसँग कुरा गर्दै कांग्रेस केन्द्रीय सदस्य गिरीले संविधानले नै एनआरएन नागरिकता सुनिश्चित गरिसकेपछि एनआरएनलाई मातृभूमि आउँदा भिसा लगाउनु पर्ने प्रावधान संविधानको मर्मविपरीत रहेको बताए।

एनआरएन नेताहरूले सरकारद्वारा हालै जारी अध्यादेशमा गैरआवासीय नेपाली नागरिकता लिइसकेकालाई दश वर्ष नि:शुल्क भिसा दिने प्रावधानको विरोध गरिरहेका छन्।

एक प्रश्नको जवाफमा पूर्वमन्त्री गिरीले सरकारको काम सुस्त रहेको बताए। यद्यपि उनले यो सरकारलाई काम गर्न दिनु पर्ने बताउँदै पटक पटक सरकार बदल्दा देशमा राजनीतिक अस्थिरता हुने पनि जिकिर गरे ।

गिरीले राष्ट्रिय स्वतन्त्र पार्टीका सभापति रवि लामिछानेकोबारे अदालतमा मुद्दा विचाराधीन रहेकाले थप टिप्पणी गर्न नचाहेको बताए ।

‘सबै सहकारी पीडितहरूले न्याय पाउनु पर्छ। उनीहरूको बचत रकम फिर्ता पाउनु पर्छ। यसमा सरकारले खुट्टा कमाउनु हुदैँन। जुनसुकै पार्टीको भए पनि छुट दिनु हुँदैन’, उनले भने ।

सूर्यदर्शन सहकारी संस्थाको बचत रकम ठगी अभियोगमा जिल्ला अदालत कास्कीबाट ६५ लाख धरौटीमा रिहा भएका लाछानेसहित सातै जनालाई पुर्पक्षका लागि थुनामा पठाउन माग गर्दै उच्च अदालतमा निवेदन दर्ता भइसकेको छ।

यता कालिमाटीस्थित स्वर्णलक्ष्मी सहकारी ठगीको अभियोगमा काठमाडौँ जिल्ला अदालतको आदेशपछि रवि ६० लाख धरौटी बुझाएर रिहा भएका छन् । उनका साझेदार छविलाल जोशी पनि कास्कीमा ८८ लाख र काठमाडौंमा ५० लाख धरौटी राखेर छुटेका छन् ।