चितवन- नेकपा (माओवादी केन्द्र) का अध्यक्ष पुष्पकमल दाहाल प्रचण्डले नेपाली कांग्रेस र नेकपा एमालेको गठबन्धन सरकार धेरै लामो नजाने दाबी गरेका छन् ।

काठमाडौं फर्किने क्रममा चितवनको भरतपुर विमानस्थलमा मंगलबार सञ्चारकर्मीसँगको संक्षिप्त कुराकानीका क्रममा केपी शर्मा ओ‌ली नेतृत्वको सरकारबारे दाहाले यस्तो अड्कल काटेका हुन् ।

प्रचण्डले ओली नेतृत्वको सरकार धेरै नजाने घोषणा गरिरहँदा कांग्रेस नेताहरू डा. शशांक कोइराला र डा. चन्द्र भण्डारी पनि साथमा थिए ।

‘यो सरकार धेरै लामो जान्छ भन्ने हामीलाई लाग्दैन । यो कुरा मैले प्रष्टसँग भन्ने गरेको छु । यो गठबन्धन स्वभाविक छैन । पारदर्शी पनि छैन । यसका काम पनि उल्टा हुँदै गएका छन् । अध्यादेशसम्म आउँदा लाजैमर्दो अवस्था भइसकेको छ’, दाहालले भने ।

प्रचण्डले ओली नेतृत्वको सरकार छिट्टै ढल्ने बताइरहँदा माओवादीको प्रथामिकता सरकार नरहेको जिकिर गर्न पनि भ्याए । ‘हाम्रो प्रथामितामा सरकार छैन, तर यो सरकार धेरै जाँदैन’, दाहाले भने, ‘माओवादी अहिले संगठन निर्माणमा लागिरहेको छ ।’

उता दाहालले बोलिसकेपछि उनको साथमा विमानस्थलको भीआईपी कक्षमा रहेका कांग्रेस नेता कोइरालाले एमालेसँग मिलेर राजनीतिक स्थायित्व दिन सकिने विश्वाससहित सहकार्य गरेको बताए ।

राजनीतिमा जेसुकै सम्भव रहेको बताएका कोइरालाले प्रचण्डले सरकार लामो नजाने भनेर दिएको वक्तव्यमा मौनता साँधे । यसबारे कांग्रेसका अर्का नेता भण्डारीले प्रतिक्रिया दिएनन् ।