काठमाडौं– कटारी नगरपालिका–२ खोक्सामा १५ दिनसम्म चल्ने त्रिवेणी मेला आजबाट शुरु भएको छ । वर्षेनी माघ १ गतेबाट सुरु भएर १५ दिनसम्म लाग्ने मेला यसवर्ष भने २० गतेसम्म लाग्ने कटारी नगरपालिकाले जनाएको छ ।

कमला, तावा र ककरु नदीको संगमस्थल त्रिवेणीघाटमा लाग्ने मैनी मेला त्रिवेणी मेलाको रूपमा परिचित छ । तीन नदीको संगमस्थलमा मकर स्नान गरी भाकल गरे शरीरमा रहेको चर्मरोग निको हुने, पशुपक्षी बलिदिई पूजा आराधना गर्नाले चिताएको कुरा पूरा हुने जनविश्वास रहेको कटारी नगरपालिका-२ का वडा अध्यक्ष प्रेम बहादुर थापाले उल्लेख गरे । 

यस मेलामा कोशी, मधेश, बाग्मती प्रदेशको अलावा भारत बाट समेत तिर्थालू आउने गरेको अध्यक्ष थापा बताउँछन् ।

माघे सङ्क्रान्तिमा मात्र नभएर माघ महिना भरनै देशभरिका भक्तजन त्रिवेणी मेला आउने गरेको कटारी नगर प्रमुख राजेशचन्द्र श्रेष्ठले बताए।

सडक सञ्जाल जोडिनु पूर्व पहाडी जिल्ला ओखलढुङ्गा, खोटाङ, सोलुखुम्बुका स्थानीयवासीले यो मेलाबाट आवश्यक लत्ता, कपडा, नुन, तेल, मरमसला खरिद गर्नुका साथै पहाडका भोटे कुकुर ,कृषि उत्पादन मेलाको आकर्षण हुने गरेको कटारी नगरपालिका उप प्रमुख गीता खड्काको भनाई छ । 

मेला उदयपुरको कटारी नगरपालिका र सिन्धुलीको दुधौली नगरपालिकाको सिमानामा लाग्दै आएको छ । मैनि मेलाले परिचित यस मेला नेपालकै पुरानो र लामो समय सम्म लाग्ने मेला मध्यमा त्रिवेणी मेला पर्ने गरेको नगर प्रमुख श्रेष्ठले बताए । यस्तै,मेलामा सिन्धुलीको जुनार, ओखलढुङ्गाको राढी पाखी र स्थानीय उत्पादनको किनबेच हुने गर्दछ ।