सिन्धुपाल्चोक- नेकपा माओवादी केन्द्रका अध्यक्ष पुष्पकमल दाहाल प्रचण्डले चिनियाँ राष्ट्रपति सी चिनफिङसँग आफूले तीन पटक कुरा गरेपछि सिन्धुपाल्चोकको तातोपानी नाका खुल्ने चरणमा गएको बताएका छन् ।

सिन्धुपाल्चोकको सुकुटेस्थित सुनकोशी नदीको किनारामा आयोजित सातौँ महिला तथा आठौँ पुरुष राष्ट्रिय बिच भलिबल प्रतियोगिताको मंगलबार उद्घाटनका क्रममा उनले यस्तो बताएका हुन् ।

दाहालले २०७२ सालको विनाशकारी भूकम्पपछि तातोपानी नाका रोकिने अवस्था आएको बताउँदै अब यसले पुरानै गति समात्ने पनि उल्लेख गरे ।

‘मैले चीन भ्रमणमा जाँदा तीन पटकसम्म राष्ट्रपति सी चिनफिङसँग तातोपानीनाका हरहालतमा खोलिदिनुपर्छ भनेको थिएँ’, उनले भने, ‘नेपाल-चीन व्यापार र विकासमा पनि यो रणनीतिक नाका थियो । चीनका राष्ट्रपतिजीकै निर्देशनमा यो नाका खुल्नेतिर गएको छ। मैले नभनेको भए यो वर्षौँसम्म खुल्ने थिएन ।’

सुकुटेमा सोमबार पुगेका उनले राजनीतिक भाषण गरेनन् । बरु भलिबल खेलसहितलाई प्रोत्साहन गर्न आफू सरकारमा हुँदा पनि पहल गरेको बताएका छन् ।

नेपाल भलिबल संघ, सिन्धु-सुकुटे पर्यटन व्यवसायी संघ र सिन्धुपाल्चोक जिल्ला भलिबल संघको आयोजनामा भलिबल प्रतियोगिता सुरु भएको हो ।

बालुवामाथि खेलिने भलिबल प्रतियोगिता खेलकुद र पर्यटन दुवै हिसाबले महत्त्वपूर्ण मानिन्छ। खेल सुरु भएको छ।