काठमाडौं– प्रमुख प्रतिपक्षी दल नेपाली कांग्रेसका सभापति शेरबहादुर देउवाले वर्तमान सरकार अधिनायवादतर्फ अन्मुख भएको उल्लेख गर्दै त्यसका विरुद्धमा लडाइँ लड्नुपर्ने बेलाएका आएको बताएका छन् ।

पूर्व प्रधानमन्त्री समेत रहेका देउवाले कम्युनिस्ट अधिनायकवादविरुद्ध जस्तोसुकै लडाइँ लड्न पनि तयार हुनुपर्ने समेत बताए ।

सरकारले प्रहरी, सेनादेखि कर्मचारी प्रशासनलाई आफ्नो पार्टी (नेकपा)प्रति प्रतिवद्ध बनाउन खोजेको पनि देउवाले आरोप लगाए ।

सभापति देउवाले पार्टीभित्रका अन्तरघातीलाई कारबाही गर्न खोज्दा रोक्नेलाई बाहिर ल्याउने पनि चेतावनी दिएका छन् ।

कांग्रेसको नीति तथा प्रशिक्षण प्रतिष्ठानले शुक्रबार भक्तपुरमा आयोजना गरेको प्रशिक्षण कार्यक्रममा बोल्दै सभापति देउवाले पार्टी भित्रैका व्यक्तिले चुनावमा एक–अर्कालाई हराएको भन्दै त्यस्ता अन्तरघातीलाई कारबाही गरेरै छाड्ने पनि चेतावनी दिए ।

सभापति देउवाले अन्तरघातीलाई कारबाही गर्न खोज्दा रोक्ने व्यक्तिको अनुहार पनि सार्वजनिक गर्ने बताए ।