काठमाडौं- नेकपा एमालेको गैरभौगोलिक ‘युवा विद्यार्थी विशेष जिल्ला कमिटीको’ कार्यालय शुभारम्भ गरिएको छ ।

एमाले पोलिटब्युरो सदस्य तथा उपत्यका विशेष प्रदेश इञ्चार्ज सुजिता शाक्यले कार्यालय उद्घाटन गरेकी हुन् । काठमाडौं महानगरपालिका-१० बुद्धनगरस्थित बागमती करिडोरमा कार्यलयको उद्घाटन गरिएको हो ।

उद्घाटनपपछि शाक्यले पार्टी संगठनको काम सरल, सहज र व्यवस्थित गर्न कार्यालय आवश्यकता पर्ने बताइन् । उनले कमिटीले कार्यालय राखेर पार्टी काम व्यवस्थित गर्न लागेकोमा खुशी लागेको उल्लेख गरिन्। उनले संगठनको काम योजनावद्ध रुपमा गर्न सुझाव दिइन् ।

कार्यक्रममा कमिटीका इन्चार्ज रमेश पौडेलले संगठनलाई चलायमान, गतिशील बनाउन र आसन्न स्ववियु निर्वाचनमा अनेरास्ववियुलाई विजयी गराउन कमिटीले ठोस योजनासहित अघि बढ्नुपर्ने निर्देशन दिए ।

कार्यक्रममा प्रदेश अधक्ष प्रेम पराजुली, सचिव मिलन धरेल लगायतका नेताहरू उपस्थित थिए ।

कमिटीका अध्यक्ष सुदर्शन शिवाकोटीका अनुसार २०४८ सालमादेखि यो कमिटी कृयाशील छ । यसका संस्थापक सचिव एमालेका वर्तमान महासचिव शंकर पोखरेल हुन् ।

२०७५ सालमा एमाले-माओवादी एकतापछि ‘युवा विद्यार्थी विशेष’ नामाकरण गरिएको थियो । नेकपा टुटेपछि यही नामबाटै कमिटीले गतिविधि गरिरहेको कमिटीका प्रचार विभाग प्रमुख किरण देउजाले बताए ।

यसअघि उपत्यका प्रदेशको कार्यालयबाटै युवा विद्यार्थी विशेष कमिटीले आफ्ना राजनीति तथा सांगठनिक गतिविधि गर्दै आइरहेको थियो ।