काठमाडौं- नेपाली कांग्रेसका महामन्त्री गगन थापाले संघीयतालाई बलियो बनाउनका लागि प्रदेश र स्थानीय तहलाई अधिकारसम्पन्न बनाउने गरि कानून बनाउनुपर्ने बताएका छन् ।

संघीयता सवलीकरणका सन्दर्भमा मंगलबार ललितपुरमा आयोजित कार्यक्रममा बोल्दै थापाले यसो भनेका हुन् ।

उनले सबै तहलाई अधिकारसम्पन्न बनाएर संघीयता कार्यान्वयन गर्नुपर्ने बताउँदै त्यसो गर्दा पनि काम गर्न नसके समाधानको उपाय खोज्नुपर्ने उल्लेख गरे ।

अहिले ठूला दल मिलेर सरकार गठन भएकाले सदनबाट कानुन बनाउन सहज हुने उनको भनाइ छ । अब संघीयता कार्यान्वयनसम्बन्धी कानून बनाउन ढिलाइ गर्न नहुने उनले जोड दिएका छन् ।

महामन्त्री थापाले पुराना र नयाँ भनिएका दलहरूसमेत संघीयताप्रति उदार भने हुन नसकेको जिकिर गरे ।

उनले संविधान संशोधनका लागि आवश्यक विषयमा खुला रुपमा बहस र छलफल हुने भएकाले यसप्रति कसैले शंका गर्न नपर्ने बताए ।

थापाले सरकारमा गएकाहरूले अधिकारलाई मुठ्ठीमा राख्ने गरेकाले संघीयता नै दुर्घटनामा पर्ने देखिएको बताए ।